Մինչ թերթը մամուլին կը յանձնէինք, մեր ուշադրութունը գրաւեց վերոյիշեալ յատկանշական թիւը: Տակաւին 12 օրեր առաջ կը ծանուցէինք «Արարատ»-ի ծննդեան 87-րդ տարեդարձին մասին: Եւ այսօր հպարտօրէն կ’արձանագրենք, որ 1937 թուականէն ասդին «Արարատ» պատնէշի վրայ գտնուած է 22222 անգամ, շրջանցելով իր առջեւ ցցուած «բանիւ եւ գործով, կամայ եւ ակամայ, գիտութեամբ եւ անգիտութեամբ» խոչերն ու դժուարութիւնները: Իսկ այսօր, ապահովուած անցեալի փորձառութեամբ եւ նորարարութիւններուն հաղորդ միջոցներով զինուած, դանդաղօրէն դէպի ուծացումի վայրէջքը գլորուող սփիւռքեան իրականութեան մէջ, «Արարատ» կը փորձէ թիավարել հոսանքն ի վեր: Սփիւռքեան այս խռովայոյզ աշխարհամասին վրայ 50 տարի ետք պիտի կարդա՞նք «Արարատ»-ի ազնիւ ցրուիչներուն լուսաբացէն առաջ հրամցուցած թիւը: Պիտի հասնի՞նք 33333-ին: Մաղթենք որ պատասխանը «այո՛» ըլլայ: Մենք պիտի գործենք, պիտի մարտնչինք ա՛յդ տեսլականին հասնելու համար: Այլընտրանք չունինք:
Մինչ այդ, ՇՆՈՐՀԱՒՈՐ ԸԼԼԱՅ «Արարատ»-ի յարգելի երկրպագուներ, ընթերցողներ: Դուք այսօր՝ Երեքշաբթի 19 Նոյեմբեր 2024-ին, կ’ընթերցէք «Արարատ»-ի 22222-րդ թիւը:
