Երէկ՝ 18 Նոյեմբերին, Ամենայն Հայոց Գարեգին Բ. կաթողիկոսին օրհնութեամբ Իտալիոյ մայրաքաղաք Հռոմի մէջ կազմակերպուեցաւ համաժողով մը՝ նուիրուած Արցախի մշակութային ժառանգութեան պահպանումին:
Հայաստանի վարչապետ Նիկոլ Փաշինեան առանձնազրոյց մը ունեցաւ Հռոմի Ֆրանչիսկոս պապին հետ: Վարչապետը Հայաստանի ամբողջական աջակցութիւնը յայտնեց Վատիկանին՝ միջազգային հարթակներուն մէջ խաղաղութեան օրակարգի սպասարկումին եւ այդ ուղղութեամբ միասին գործելու հարցով: Վարչապետը պապին ներկայացուց Հայաստան-Ատրպէյճան խաղաղութեան հոլովոյթին մանրամասնութիւններն ու վերահաստատեց Երեւանի յանձնառութիւնը խաղաղութեան հոլովոյթին: Ան նաեւ շնորհակալութիւն յայտնեց Վատիկանին՝ Ատրպէյճանի մէջ պահուող հայ գերիներու ազատ արձակումին ուղղութեամբ տարած աշխատանքին համար: Նշենք, որ Հայաստանի վարչապետը Վատիկան այցելութեան ընթացքին շրջեցաւ նաեւ Սուրբ Աթոռի թանգարաններուն մէջ, ապա ծաղիկներ խոնարհեց Ս. Գրիգոր Լուսաւորիչի եւ Ս. Գրիգոր Նարեկացիի արձաններուն մօտ:
