Հայաստանի արտաքին գործերու նախարար Արարատ Միրզոյեան յայտնեց, որ Պաքուի հետ կնքուելիք խաղաղութեան պայմանագրի ամբողջացումին համար մնացած են 1-2 ձեւակերպումներ եւ յօդուածներ, որոնց շուրջ աշխատանքները կը շարունակուին աւելի կառուցողական մթնոլորտի մէջ, քան նախորդ փուլին: Հետեւաբար, նախարարը զգուշաւոր լաւատեսութիւն յայտնեց խաղաղութեան պայմանագրին շուրջ մօտալուտ համաձայնութեան մասին:
Հայաստանի վարչապետ Նիկոլ Փաշինեան յայտնեց, որ Ատրպէյճանի հետ կնքուելիք խաղաղութեան պայմանագրին մնացեալ երկու յօդուածներուն վերաբերող առաջարկները հայկական կողմը փոխանցած է Ատրպէյճանին, սպասելով Պաքուի արձագանգը: Փաշինեան յայտնեց, որ վերջերս ՊՐԻՔՍ համախմբումի ժողովին ընթացքին շատ կարեւոր եւ արդիւնաւէտ տեսակցութիւն ունեցած էր Ատրպէյճանի նախագահ Իլհամ Ալիեւի հետ՝ քննարկելու համար տարակարծութեանց առարկայ հանդիսացող նիւթերը եւ խաղաղութեան պայմանագիր մը կնքելու հնարաւորութիւնները: Փաշինեանի համաձայն, Ալիեւի հետ խօսակցութեան կարեւորագոյն հատուածը այն էր, որ Հայաստանն ու Ատրպէյճանը խաղաղ գոյակցութեան համար կարիք ունին ոչ միայն խաղաղութեան պայմանագրի կամ պայմանագրերու, այլ ռազմավարական գործարք մը կնքելու: Փաշինեան Ազգային ժողովէն հակադարձեց Հայաստանի Սահմանադրութիւնը փոխելու մասին Ատրպէյճանի նախագահին շարունակական պահանջներուն, շեշտելով որ խաղաղութեան պայմանագրի ծիրին մէջ որեւէ կարիք չկայ փոխելու Սահմանադրութիւնը:
