Մայրաքաղաքային թիրախներու ռմբակոծումը նշում կատարեց կարեւոր մէկ այլ թղթածրարի՝ զինադադարի բանակցութիւններու վճռորոշ փուլ մուտքին: Ռազմական գործողութիւններուն բանակցային վերջ դնելու պարտականութիւնը վստահուած է Միացեալ Նահանգներու նախագահի յատուկ պատուիրակ Ամուս Հոքշթայնին, որ նախապէս յաջողած էր ծովային սահմանագծումի համաձայնութիւն կնքելու աշխատանքին մէջ: Կը սպասուի, որ Հոքշթայն շուտով այցելէ Պէյրութ եւ Թել Աւիւ՝ վերջնականացնելու համար զինադադարի ամերիկեան առաջարկը, որուն յօդուածներուն վերաբերեալ կան շատ տարաձայնութիւններ: Նախապէս կը կարծուէր, թէ բանագնացը այսօր պիտի հասնէր Պէյրութ, սակայն ամերիկեան լրատուամիջոցներ երէկ հաղորդեցին, որ Հոքշթայն հաւանաբար ժամանէ վաղը՝ ստանալէ ետք զինադադարի ամերիկեան առաջարկին մասին լիբանանեան պաշտօնական պատասխանը: Այս առումով չէ բացառուած, որ Լիբանանի կառավարութիւնը այսօր ամերիկեան դեսպանատան փոխանցէ զինադադարի առաջարկին իր պատասխանը՝ խորհրդարանի նախագահ Նեպիհ Պըրրիի առաջնորդած եւ Հըզպալլան ներառած մանրամասն քննարկումներէ ետք: Վարչապետի պաշտօնակատար Նեժիպ Միքաթի յայտնեց, որ Հոքշթայն շուտով պիտի հասնի Պէյրութ, աւելցնելով որ Լիբանան դրական պատասխանած է ամերիկեան առաջարկին, սակայն կան որոշ կէտեր, որոնք պէտք է աւելի մանրամասն քննարկել: Իսկ երեսփոխան Սիմոն Ապի Ռամիա վարչապետի պաշտօնակատարին հետ տեսակցելէ ետք յայտնեց, որ «զինադադարը շատ մօտալուտ է, եթէ Իսրայէլ վերջին պահուն չփոխէ իր կեցուածքը»: Կառավարութեան մէջ Հըզպալլան ներկայացնող նախարարներէն՝ աշխատանքի նախարար Մուսթաֆա Պէյրամ երէկ այցելեց Այն Թինէ եւ տեսակցեցաւ Պըրրիի հետ, ապա լրագրողներուն յայտնեց, որ «մթնոլորտը դրական է եւ լիբանանեան պատասխանը Հոքշթայնին պիտի փոխանցէ այսօր, սակայն կը մնայ տեսնել, թէ իրապէս ինչ պիտի ըլլայ աւարտին»: Զինադադարի հաւանականութեան մասին խօսեցաւ նաեւ խորհրդարանի փոխնախագահ Էլիաս Պու Սաապ: Անոր համաձայն, ամերիկացի պատուիրակը չ’ուզեր ձախող այցելութիւն, այլ կ’աշխատի յաջողցնել զինադադարի համաձայնութիւնը:
Ի տես իսրայէլեան ոճրագործութիւններուն, Արտաքին գործերու նախարարութիւնը ՄԱԿ-ի մէջ Լիբանանի պատուիրակութեան յանձնարարեց նոր բողոք մը ներկայացնել Իսրայէլի դէմ՝ բողոքելով լիբանանեան բանակի շարունակական թիրախաւորումէն:
Իրանի Արտաքին գործերու նախարարութիւնը յայտարարեց, թէ «լիբանանցիները կարողութիւն ունին ճշդելու իրենց շահերը եւ կայացնելու անհրաժեշտ որոշումները՝ կասեցնելու համար իսրայէլեան ոճրագործութիւնները»
