Իրանի իսլամական յեղափոխութեան հոգեւոր գերագոյն առաջնորդ այաթոլլա Ալի Խամինէիի գլխաւոր խորհրդական Ալի Լարիժանի երէկ այցելեց Պէյրութ, ուր տեսակցեցաւ խորհրդարանի նախագահ Նեպիհ Պըրրիի եւ վարչապետի պաշտօնակատար Նեժիպ Միքաթիի հետ: Լարիժանի Թեհրանի զօրակցութիւնը յայտնեց Լիբանանի ժողովուրդին, բանակին եւ Դիմադրութեան, ընդդէմ իսրայէլեան ոճրային յարձակումներուն: Ան Պըրրիի հետ արծարծեց զինադադարի յանգելու բանակցութիւնները եւ տեղահանուած լիբանանցիներուն զօրակցելու միջոցները: Ժողովէն ետք իրանցի պաշտօնատարը յայտնեց, որ Պըրրի իրեն ներկայացուցած է դրական մանրամասնութիւններ, վերահաստատելով որ Թեհրան կը կանգնի «Լիբանանի կառավարութեան եւ Դիմադրութեան կայացուցած որոշումներուն կողքին»: Իսկ Միքաթի Լարիժանին ընդունած ատեն կոչ ուղղեց զօրակցելու 1701 բանաձեւը գործադրելու Լիբանանի կեցուածքին, առաջարկելով չառնել լիբանանեան որեւէ խմբաւորումի մօտ լարուածութիւն յառաջացնող կեցուածքներ:
