Եգիպտոսի արտաքին գործերու նախարար Պատր Ապտ էլ-Աաթի երէկ զօրակցական այցելութեամբ ժամանեց Պէյրութ, ուր տեսակցեցաւ վարչապետի պաշտօնակատար Նեժիպ Միքաթիի եւ խորհրդարանի նախագահ Նեպիհ Պըրրիի հետ: Եգիպտացի նախարարը կոչ ուղղեց նոր նախագահի ընտրութիւնը չհամարելու զինադադարի նախապայման մը: «Գահիրէ պիտի շարունակէ ջանք թափել Լիբանանի մէջ զինադադար հաստատելու ուղղութեամբ», ըսաւ հիւր նախարարը, ռազմական գործողութիւններու դադրեցումին կողքին կարեւորելով նաեւ լիբանանեան պետական հաստատութիւններու գործունէութեան շարունակութիւնը:
«Անընդունելի է Լիբանանի հողային ամբողջականութիւնն ու անվտանգութիւնը խախտող որեւէ համաձայնութեան կնքումը», ըսաւ եգիպտացի նախարարը: Անոր խօսքով, իսրայէլեան թշնամական գործողութիւնները պէտք չէ շարունակուին մինչեւ ամերիկացի նախագահ Տոնըլտ Թրամփի երդմնակալութեան պաշտօնական արարողութիւնը՝ երկու ամիս ետք:
Խորհրդարանի նախագահ Նեպիհ Պըրրի իր կարգին հաւաստիացուց, որ Լիբանան պիտի չենթարկուի իսրայէլեան պահանջներուն եւ նախապայմաններուն: «Ոչ մէկ խոհեմ անձ կը կարծէ, թէ Լիբանան համաձայն պիտի գտնուի լուծումի մը, որ կ’ապահովէ Իսրայէլի շահերը՝ լիբանանեան շահերուն հաշուոյն», շեշտեց Պըրրի:
Ուաշինկթընի մէջ, Փաղանգաւոր կուսակցութեան նախագահ, երեսփոխան Սամի Ժըմայէլ տեսակցեցաւ նախագահ Ճօ Պայտընի յատուկ պատուիրակ Ամուս Հոքշթայնի հետ ու շեշտեց, որ տարածաշրջանային որեւէ կարգաւորումի պարագային նկատի առնուին նաեւ Լիբանանին ու լիբանանցիներուն իրաւունքները, պահպանուի երկրին գերիշխանութիւնը եւ վերականգնուի ժողովուրդին ազատ որոշումը:
Լիբանանեան զարգացումներուն անդրադարձաւ նաեւ Սուրիոյ հարցով Ռուսիոյ նախագահի յատուկ պատուիրակ Ալեքսանտըր Լավրենթիեւ: Մեկնաբանելով սուրիական հողերէն Հըզպալլայի զինամատակարարումը սառեցնելու հարցով իսրայէլեան պայմանին, ռուս պաշտօնատարը շեշտեց, որ այդ հարցը մաս չի կազմեր Սուրիոյ մէջ գործող ռուս խաղաղապահներու իրաւասութեանց:
Թուրքիոյ նախագահ Ռեճեպ Թայիպ Էրտողան յայտնեց, որ «Անքարա յաջորդ փուլին պիտի շարունակէ իր հակաիսրայէլեան գործունէութիւնը եւ հատած է բոլոր առեւտրական յարաբերութիւնները»: Անոր համաձայն, Կազայի եւ Լիբանանի դրութիւնը անհանգիստ պիտի մնայ, որովհետեւ մեծաքանակ զէնք ու զինամթերք կը մատակարարուի Իսրայէլին:
