Լիբանանի մէջ սննդամթերք ներածող ընկերութիւններու սեփականատէրերու սենտիքայի նախագահ Հանի Պոհսալի յայտնեց, որ անհրաժեշտ սննդամթերքի սակագիները Լիբանանի մէջ ընդհանուր առմամբ կը մնան կայուն, որովհետեւ չկան գիներու աճ յառաջացնող պայմաններ: Ըստ Պոհսալիի, սննթամթերք վաճառող հաստատութիւններուն առաջարկը ծաւալով շատ աւելի մեծ է սպառողներու պահանջարկէն, ինչ որ կայուն կը պահէ սակագիները, հակառակ պատերազմական իրավիճակին: Սենտիքայի նախագահին խօսքով, Լիբանան մէջ կայ սննդանիւթերու հսկայական պահեստաւորում՝ ներածող ընկերութիւններու մթերանոցներուն մէջ, հանրային վաճառատուներուն եւ փոքր նպարավաճառներուն մօտ, ինչպէս նաեւ քաղաքացիներու բնակարաններուն մէջ, ուստի սննդանիւթի անբաւարարութեան վտանգ չկայ: «Լիբանանցիները դասեր քաղած են 2006-ի պատերազմէն եւ սննդանիւթ մթերած են, որպէսզի խնդիրներ չդիմագրաւեն Լիբանանի պաշարումին պարագային», կարծիք յայտնեց Պոհսալի: Ըստ անոր, մարդասիրական օգնութիւնները եւս դեր կը խաղան որոշ նիւթերու սակագինի նուազումին մէջ:
