Հըզպալլա բաւարար զէնք եւ միջոցներ ունի երկարատեւ պատերազմ մղելու համար: Այդ մասին յայտնեց կուսակցութեան բանբեր Մոհամմատ Աֆիֆ, դիտել տալով, որ «իսրայէլեան բանակը կարողութիւն չունի յաջողութիւններու հասնելու Լիբանանի հարաւային գօտիին մէջ եւ նոյնիսկ չեն կրցած գիւղ մը գրաւել»: Աֆիֆ հաւաստիացուց, որ յարաբերութիւնը շատ ամուր է Հըզպալլային ու լիբանանեան բանակին միջեւ եւ զայն կարելի չէ թուլացնել: Ան խօսեցաւ Թեհրանի, Մոսկուայի եւ Ուաշինկթընի միջեւ քաղաքական խորհրդակցութիւններու մասին, որոնց նպատակն է հասնիլ զինադադարի, սակայն վստահեցուց, որ ցարդ որեւէ առաջարկ չէ հասած Պէյրութ: «Յաղթանակի մեր հասկացողութիւնն է թշնամիի նպատակներու իրագործումին ձախողութիւնը», շեշտեց Աֆիֆ՝ աւելցնելով, որ չդիմադրելը ինքնին պարտութիւն է: Քննադատելով Հըզպալլային ընդդիմացող լիբանանեան կողմերը, Աֆիֆ անոնց կոչ ուղղեց գէթ հաղորդագրութեամբ մը դատապարտելու քաղաքացիներուն եւ պատմամշակութային վայրերուն նկատմամբ Իսրայէլի գործած յարձակումները:
