Դրութիւնը աւելի կայուն եւ անվտանգ չէր սահմանամերձ իսրայէլեան բնակավայրերուն մէջ, որոնցմէ շատեր թիրախ դարձան Հըզպալլայի հրթիռներուն եւ անօդաչու սարքերուն: Իսրայէլեան բանակը նշեց, որ լիբանանեան հողերէն աւելի քան 80 հրթիռ արձակուած է զօրամասերու եւ բնակավայրերու վրայ, հասնելով մինչեւ Հայֆայի ծոց: Շտապ օգնութեան ծառայութիւնը յայտարարեց, թէ քանի մը հոգի վիրաւորուած է եւ ինքնաշարժներ կործանուած են Քրիաթ Աթա եւ Քրիաթ Եամ բնակավայրերուն մէջ: Բանակը նշեց, որ անցնող 24 ժամերուն 15 զինուոր վիրաւորուած է Լիբանանի ճակատին վրայ, իսկ Կազայի մէջ՝ 11: Գերեվարուած իսրայէլացիներու հարազատները երէկ ներխուժեցին Քնէյսէթի սսահմանադրական հարցերով մնայուն յանձնախումբին ժողովը եւ պահանջեցին անյապաղ ապահովել գերիներուն ազատ արձակումը: Իսկ Լիբանանի հետ սահմանային գօտիին մերձակայ շարք մը բնակավայրերու քաղաքապետներ բանակին կոչ ուղղեցին չդադրեցնելու պատերազմը, մինչեւ որ վերջ դրուի Հըզպալլայի վտանգին: Իսրայէլի մէջ կատարուած հարցախոյցի մը արդիւնքները ցոյց տուին, որ մասնակիցներուն 54 առ հարիւրը կը զօրակցի Հըզպալլայի դէմ արշաւի շարունակութեան:
