Տեղեկատուութեան նախարարի պաշտօնակատար Զիատ Մաքարի յայտնեց, որ նախարարութիւնը միջոցներու ձեռնարկած է միջազգային լրատուական տասը հաստատութեան նկատմամբ, որոնց ներկայացուցիչները իսրայէլեան բանակին ընկերակցելով մուտք գործած են լիբանանեան հարաւային գիւղեր: Մաքարի օտարազգի լրագրողներուն այդ արարքը համարեց լիբանանեան գերիշխանութեան բացայայտ խախտում, աւելցնելով որ ազատ արտայայտուելու սկզբունքը պէտք է տնօրինուի պատասխանատուութեամբ:
Խորհրդարանի փոխնախագահ Էլիաս Պու Սաապ կարծիք յայտնեց, որ իսրայէլեան նպատակը Հըզպալլան կործանելը չէ, այլ լիբանանեան հարաւի սահմանային գօտիին վրայ ապազինեալ գօտի հաստատելը: «Իսրայէլացիները չէին նպատակադրեր ցամաքային լայնածաւալ գործողութիւն մը շղթայազերծել», ըսաւ Պու Սաապ՝ աւելցնելով, որ Թել Աւիւ ի վերջոյ պիտի ընդունի դիւանագիտական լուծումը, որուն պայմանները արդէն բիւրեղացած են ու կ’ակնկալուի, որ ամերիկացի յատուկ պատուիրակ Ամուս Հոքշթայն տարածաշրջան այցելէ յառաջիկայ շաբաթ՝ շարունակելու համար բանակցութիւնները:
Իսրայէլի պաշտպանութեան նորանշանակ նախարար Իսրայէլ Քաց յայտնեց, որ «իսրայէլեան բանակը պատերազմի ամիսներուն ընթացքին ապացուցեց, թէ անոնք որոնք կը փորձեն մեզի վնաս պատճառել, պիտի վճարեն շատ սուղ գին, իսկ ես պիտի ըլլամ բանակին պաշտպանը եւ առաջնահերթութիւններուս մէջ գլխաւոր տեղ յատկացուած է գերիներու ապահով տունդարձին»: Քաց նշեց, որ իր ամերիկացի պաշտօնակից Լոյտ Ուսթինի հետ քննարկած է գերիները ազատ արձակելու եւ Իրանի սպառնալիքները դիմակայելու միջոցները:
Նշենք, որ Իսրայէլի խորհրդարանը օր մը առաջ վաւերացուցած էր վարչապետ Պենիամին Նեթանիահուի առաջարկը՝ արտաքին գործերու նախարար Իսրայէլ Քացին պաշտպանութեան նախարարութիւնը յանձնելու եւ Ղատաուն Սաէրը արտաքին գործերու նախարար նշանակելու մասին:
