Արտակարգ իրավիճակ կը տիրէր երէկ ոչ միայն լիբանանեան բազմաթիւ շրջաններու մէջ եւ սահմանային գօտիին վրայ, այլ նաեւ Թել Աւիւի եւ իսրայէլեան կեդրոնական բնակավայրերուն մէջ, ուր շչակները բազմիցս հնչեցին՝ ահազանգելով հիւսիսային սաւառնող հրթիռներու վտանգէն: Ըստ տեղական լրատուամիջոցներուն, հինգ պայթում լսուած է Թել Աւիւի արուարձաններուն մէջ, հրթիռ մըն ալ ինկած է «Պեն Կորիոն» օդակայանին վրայ՝ զգետնելով բոլոր թռիչքները: Իսրայէլեան բանակը իր կարգին յայտարարեց, թէ հակաօդային պաշտպանութեան միջոցներով կործանած է Թել Աւիւի ուղղութեամբ Հըզպալլայի արձակած հրթիռներուն մէկ մասը: Լիբանանի սահմանային գօտիին կից, Հըզպալլայի հրթիռներ ինկան նաեւ սահմանամերձ Աւիւիմ բնակավայրին մէջ, պատճառելով չորս վիրաւոր, աւելի ուշ հրթիռ մըն ալ հասաւ Սաֆատ:
Իսրայէլեան շրջաններուն ուղղութեամբ աւելի քանի 120 հրթիռներու արձակումին զուգահեռ, իսրայէլեան օդուժը ծանր հարուածներ ուղղեց մասնաւորաբար Պաալպէք-Հըրմէլին, Նապաթիէ շրջանին եւ հարաւային որոշ գիւղերու: Իսկ երեկոյեան, քանի մը օրուայ դադարէ ետք, վերստին ռմբակոծուեցան Պէյրութի հարաւային արուարձաններու Հարէթ Հրէյք, Լէյլաքի եւ Պըրժ Պարաժինէ թաղամասերը՝ պատճառելով յաւելեալ զոհեր եւ վիրաւորներ: Պաալպէք-Հըրմէլի նահանգապետ Պաշիր Խըտր յայտնեց, որ առնուազն 30 մարդ մահացած եւ 35 ուրիշներ վիրաւորուած են Պաալպաքի շրջանը թիրախաւորած երէկուայ քսան յարձակումներուն հետեւանքով:
