Սոցիալ Դեմոկրատ Հնչակեան Կուսակցութեան մեծ ընտանիքը այսօր ուրախութեան եւ հպարտութեան զգացումներով կը տօնէ կուսակցութեան Լիբանանի օրկան՝ «Արարատ» օրաթերթի անդրանիկ հրատարակումին 87-ամեակը: Կուսակցութեան նման, «Արարատ» եւս տասնամեակներու ընթացքին ականատես դարձաւ վտանգներու եւ վերիվայրումներու, նոյնիսկ ռմբակոծումի եւ հրկիզումի փորձի: Ի դէպ, «Արարատ»-ի ուղին հարթ չէր նոյնիսկ հրապարակումէն առաջ. խափանումի փորձեր եւ ահաբեկում, հետապնդելով մէկ նպատակ՝ արգիլել Հնչակեան Կուսակցութեան նոր օրկանի հրատարակումը, որուն մէջ տեղ պիտի գտնէին օրին Լիբանանին տիրապետող գաղութատիրական ուժերուն եւ անոնց հրահանգով գործող կողմերուն անիրաւութիւնը դատապարտող նիւթեր, ուր յաւելեալ թափ պիտի տրուէր լիբանանահայ համայնքի կառուցումին եւ բարգաւաճումին: Սակայն, ոչինչ կրնար խորտակել պայքարի փուլերէ անցած յիսնամեայ կուսակցութեան կամքը, եւ, որոշ յետաձգումով հանդերձ, օրաթերթը վերջապէս հրատարակելու ծրագիրը յաջողութեամբ պսակուեցաւ 87 տարի առաջ այսօր:
Եւ ահա՛ «Արարատ» օրաթերթը շուրջ 9 տասնամեակ շարունակ բազմիցս յաղթահարած է բոլոր մարտահրաւէրները՝ սկսեալ Համաշխարհային երկրորդ պատերազմէն ու Լիբանանի անկախութենէն, մինչեւ քաղաքացիական պատերազմի դաժան տարիներն ու նորօրեայ պատերազմները, անցնելով քաղաքական ու տնտեսական գրեթէ ամէնամեայ սուր տագնապներէն: «Արարատ» կանգուն մնաց նաեւ համաշխարհային արհեստագիտական յեղափոխութեան քամիներուն դիմաց եւ որդեգրելով հանդերձ արդիական միջոցները, շարունակեց իր սուրբ առաքելութիւնը, հատեց Լիբանանի սահմանները եւ դարձաւ համայն հայութեան սեփականութիւնը, միաժամանակ միշտ յանձնառու մնալով հովանաւորող ուժին՝ Հնչակեան կուսակցութեան սկզբունքներուն եւ իր արմատներու աղաղակին:
«Արարատ» իր յաջողութիւնը կը պարտի ինչպէս կուսակցութեան իրերայաջորդ ղեկավարութիւններուն, այնպէս ալ օրաթերթին հմուտ խմբագիրներուն, նուիրուող աշխատակիցներուն եւ ընթերցողներու մեծ բանակին, որոնց համար «Արարատ»-ը եղած է ու կը մնայ լիբանանահայ կառուցուածքի գլխաւոր սիւներէն մէկը:
Հայկական մամլոյ պատմութեան մէջ խարսխուած այս տօնին առթիւ, ՍԴՀԿ Լիբանանի շրջանի Վարիչ մարմինը սրտանց կը շնորհաւորէ Լիբանանի եւ աշխարհի հնչակեաններն ու համայն հայութիւնը, երախտագիտութիւն յայտնելով «Արարատ»-ի ներկայի ու անցեալի բոլոր նուիրեալներուն, թերթին մաղթելով անխափան երթ՝ դէպի նորանոր գագաթներ:
