Հնագէտները Վանի Տուշպա թաղամասին մէջ կատարուող պեղումներուն ընթացքին յայտնաբերած են ուրարտական ժամանակաշրջանէն երկաթաքարէ (պազալթ) արձան մը, որուն կշիռը շուրջ մէկ թոն է: Ըստ Իսթանպուլի «Մարմարա» պարբերականի տուեալներուն, գտածոն յուշարձանային եռաչափ արձան է, ունի տպաւորիչ չափեր եւ վարպետօրէն քանդակուած է: Ան ունի մարմնի եւ դէմքի աննկատելի գիծեր ու ոճաւորուած գլուխ, իսկ հիմերը փորագրուած են: Շուտով պիտի կատարուին ուսումնասիրութիւններ՝ արձանին վերաբերեալ յաւելեալ մանրամասնութիւններ յայտնաբերելու համար:
