Այսօր տեղի կ’ունենայ աշխարհի մէջ գուցէ կարեւորագոյն քուէարկութիւնը՝ Միացեալ Նահանգներու նախագահական ընտրութիւնը: Ամերիկացի քաղաքացիները կ’ուղղուին քուէատուփեր՝ ընտրութիւն կատարելու հանրապետականներու կուսակցութեան թեկնածու, նախկին նախագահ Տոնըլտ Թրամփի, եւ ժողովրդավարներու թեկնածու՝ գործող փոխնախագահ Քամալա Հարիսի միջեւ: Ընտրական վերջին հարցախոյզերուն արդիւնքները կը յուշեն, թէ պայքարը մեծ պիտի ըլլայ երկու թեկնածուներուն միջեւ, նկատի առնելով որ չկայ այս կամ այն կողմի յստակ առաւելութիւն:
Ընտրութենէն օր մը առաջ, զոյգ թեկնածուները շարունակեցին քուէներ ներգրաւելու փորձերը՝ իրենց յայտարարութիւնները կեդրոնացնելով շարք մը հիմնախնդիրներու վրայ: Նախկին նախագահը իր վերջին յայտարարութիւններուն մէջ անդրադարձաւ նաեւ Միջին Արեւելքին եւ համաշխարհային այլ նիւթերու: «Նախագահ ընտրուելու պարագային վերջ պիտի տամ Միջին Արեւելքի քաոսին», ըսաւ Թրամփ՝ յիշեցնելով, որ իր նախագահութեան չորս տարիներուն մուտք չէ գործած որեւէ պատերազմի: Թրամփի քարոզարշաւի պատասխանատուներէն մէկը իր կարգին յայտնեց, որ նախագահ ընտրուելու պարագային, հանրապետականներու թեկնածուն վերջ պիտի տայ գործող նախագահ Ճօ Պայտընի միջինարեւելեան քաղաքականութեան եւ պիտի յայտարարէ խաղաղութեան նոր փուլի մը սկիզբը:
Քամալա Հարիս իր կարգին պնդեց, որ վարչակազմը առաւելագոյնս կը փորձէ դիւանագիտական լուծում գտնել Լիբանանի եւ Իսրայէլի միջեւ: «Նախագահ ընտրուելու պարագային կարելիս պիտի ընեմ նաեւ Կազայի պատերազմին վերջ տալու համար, որպէսզի իսրայէլացի գերիները եւ տեղահանուած քաղաքացիները վերադառնան իրենց տուները», ըսաւ Հարիս:
