Լիբանանեան բանակի սպայակոյտի պետ զօրավար Հասսան Աուտէ ներկայ եղաւ տասնապետներու նախապատրաստական փուլը յաջողութեամբ ամբողջացուցած զինուորներու վկայականներու բաշխումի հանդիսութեան՝ ներկայացնելով ընդհանուր հրամանատար զօրավար Ժոզէֆ Աունը: Ֆայատիէի ռազմական վարժարանին մէջ տեղի ունեցած հանդիսութեան ընթացքին զօրավար Աուտէ արտասանեց խօսք մը, որուն մէջ դիտել տուաւ, որ իսրայէլեան թշնամական գործողութիւններու լոյսին տակ, լիբանանեան բանակը կը դիմագրաւէ պատմական մարտահրաւէրներ: «Այս յարձակումին առջեւ մեր երկրին դիմակայումը առաջին հերթին կախեալ է բանակին դիմակայումէն եւ պարտականութիւններու ամբողջական կատարումէն՝ գործածելով սահմանափակ հնարաւորութիւններն ու զանազան միջոցները, որպէսզի պահպանէ պետական հաստատութիւններուն եւ հայրենիքին անվտանգութիւնը», ըսաւ բանակի սպայակոյտին պետը:
