Համաշխարհային առողջապահութեան կազմակերպութիւնը խոր մտահոգութիւն յայտնեց Լիբանանի մէջ շտապ օգնութեան ոլորտի աշխատակիցներուն դէմ յարձակումներու բազմացումին առնչութեամբ, կոչ ուղղելով զանոնք զերծ պահելու թիրախաւորումներէն:
Իսրայէլեան թշնամական գործողութիւններու սաստկացումին լոյսին տակ, մարդկային եւ նիւթական ծանր կորուստներուն զուգահեռ մտահոգութիւն կայ նաեւ Պեքաայի եւ Հարաւի պատմամշակութային հարստութեան վտանգումին վերաբերեալ: Լիբանանի մէջ ՄԱԿ-ի յատուկ յանձնակատարը ահազանգեց Պաալպաքի եւ Սուրի հնութիւններուն դիմագրաւած վտանգներուն մասին: «Լիբանանի մշակութային ժառանգութիւնը պէտք չէ դառնայ այս կործանարար հակամարտութեան հերթական զոհը», ըսաւ ան:
Հըզպալլա եւս շարք մը հաղորդագրութիւններով յայտարարեց իսրայէլեան սահմանամերձ բնակեցումի վայրերն ու զինուորական կուտակումները ռմբակոծելու մասին: Իսկ Հըզպալլայի արձակած անօդաչու թռչող սարքերը հասան իսրայէլեան ծովեզերեայ Հայֆա քաղաքի հիւսիային արուարձանները՝ խուսափելով հակաօդային պաշտպանութեան համակարգերէն: Իսրայէլեան լրատուամիջոցներ հաղորդեցին, որ Հըզպալլայի հրթիռներուն պատճառով Քարմայիլ բնակավայրին մէջ վիրաւորուած է առնուազն 9 մարդ՝ ներառեալ ծանր պարագայ մը: Իսրայէլեան լրատուամիջոցներուն համաձայն, միայն Հոկտեմբերին Կազայի եւ Լիբանանի ճակատներուն վրայ մահացած է 88 զինուոր եւ քաղաքացի: Իսկ Հըզպալլա նշեց, որ ցամաքային գործողութեան սկիզբէն ի վեր մահացած իսրայէլացի զինուորներուն թիւը 95 է, իսկ վիրաւորները՝ 900, կործանուած 42 հրասայլի եւ հինգ անօդաչու սարքի կողքին:
