Խորհրդարանի նախագահ Նեպիհ Պըրրի Այն Թինէի մէջ ընդունեց ԵՈՒՆԻՖԻԼ-ի խաղաղապահ ուժերու ընդհանուր հրամանատար զօրավար Արոլտօ Լազարոյի գլխաւորած պատուիրակութիւնը, որուն հետ արծածարծեց հարաւային զարգացումները՝ ներառեալ միջազգային ուժերու կեդրոններուն թիրախաւորումները, որոնց հետեւանքով վիրաւորուած են քանի մը խաղաղապահներ: Պըրրի դրուատեց ԵՈՒՆԻՖԻԼ-ի անդամներուն զոհողութիւնները եւ դիրքերէն չնահանջելու յանձնառութիւնը: Խորհրդարանի նախագահը ցաւ յայտնեց, որ Սեպտեմբերէն ի վեր Իսրայէլ անտեսած է զինադադարի յանգելու, 1701 բանաձեւը գործադրելու եւ սահմանին երկու կողմէն տեղահանուածներուն տունդարձը ապահովելու քանի մը հնարաւորութիւն: «Լիբանան յանձնառու կը մնայ 1701 բանաձեւին, որպէս իրավիճակը հակակշիռի տակ պահելու միակ միջոց», շեշտեց Պըրրի, որ երէկ տեսակցեցաւ նաեւ արտաքին գործերու նախարարի պաշտօնակատար Ապտալլա Պու Հապիպի հետ:
Իսկ վարչապետի պաշտօնակատար Նեժիպ Միքաթի հերքեց, թէ Ուաշինկթըն Լիբանանէն պահանջած ըլլար միակողմանի զինադադար՝ հնարաւորութիւն տալու համար ՄԱԿ-ի 1701 բանաձեւի գործադրութեան քննարկումներուն: «Ռոյթըրզ» լրատու գործակալութիւնը նախապէս հաղորդած էր, որ Միացեալ Նահանգներ Լիբանանէն կը պահանջէ միակողմանիօրէն դադրեցնել հրթիռարձակումները եւ նստիլ բանակցային սեղան:
Միքաթի եւս ընդունեց Լազարօն եւ Պէյրութի յանձնառութիւնը յայտնեց 1701 բանաձեւի ամբողջական գործադրութեան: «Իսրայէլեան գործողութիւններուն սաստկացումը ցոյց կու տայ, որ անոնք կը մերժեն զինադադար յայտարարել»:
