Մինչ լուրեր կը տարածուին հաւանական զինադադարի մը նախնական նշոյլներուն մասին, իսրայէլեան բանակը կը շարունակէ հարաւի եւ Պեքաայի շարք մը շրջաններու համատարած կործանումը՝ Հըզպալլայի զինամթերանոցները եւ կեդրոնները կործանելու պատճառաբանութեամբ: Հարաւի մէջ, իսրայէլեան օդուժը երէկ վերստին ծանրօրէն հարուածեց Սուր քաղաքը եւ մօտակայ Զրարիէ եւ Մաժտալ Զուն գիւղերը: Իսկ ծանրագոյն հարուածները հասան Եունինին, ուր մահացաւ առնուազն 7 մարդ:
Առողջապահութեան նախարարութեան արտակարգ գործողութիւններու կեդրոնը յայտարարեց, թէ Պաալպաք եւ Հըրմէլ գաւառներու բազմաթիւ գիւղերու ռմբակոծութեան հետեւանքով մահացած է առնուազն 10 անձ, իսկ վիրաւորներուն թիւը հատած է 30-ը: Իսրայէլեան հարուածները կեդրոնացան թէ՛ Պաալպաք եւ Հըրմէլ քաղաքներուն, թէ՛ մերձակայ Պազալիէ, Թարայա, Խըտըր, Սահիտէ, Ռաս էլ-Այն, Պաուատի, Իհաթ, Պըտնայէլ, Հատաս, Հարապթա եւ Շարաունիէ շրջաններուն վրայ: Իսկ Պաալպաքէն Լապուէ ճամբուն վրայ գտնուող գիւղերէն Ամհազի մէջ ինկաւ 12, իսկ մօտակայ Քասրնապայի մէջ՝ երկու զոհ: նախանցեալ գիշեր ու երէկ արեւածագին իսրայէլեան օդուժը ծանրօրէն ռմբակոծած էր Պէյրութի հարաւային արուարձանները եւ Պաապտա գաւառի մերձակայ շրջաններ, Քամաթիէ գիւղին մէջ պատճառելով երեք զոհ:
Ցամաքային գործողութիւններու ծիրին մէջ, իսրայէլեան յարձակումները կեդրոնացան արեւելեան Խիամ աւանին վրայ, ուր իսրայէլեան կողմը նոյնիսկ լուսանկար հրապարակեց ենթադրաբար խորհրդարանի նախագահի օգնական, երեսփոխան Ալի Հասան Խալիլի բնակարանէն: Խալիլ սակայն հաւաստիացուց, որ իսրայէլացի զինուորները տակաւին նոյնիսկ չեն կրցած տիրապետել Խիամին, հետեւաբար նաեւ մուտք չեն գործած իր բնակարանը: Անոր խօսքով, իսրայէլացի զինուորները ծանր դիմադրութիւն կը դիմագրաւեն քաղաքի մուտքերուն եւ ունեցած են կորուստներ:
