Որպէս նախապատրաստութիւն յառաջիկային կայանալիք Համահայկական ձմեռնային երկրորդ խաղերուն, Հայաստանի վարչապետի աշխատակազմի ղեկավար Արայիկ Յարութիւնեանի գլխաւորութեամբ տեղի ունեցաւ խաղերը կազմակերպող կոմիտէի 4-րդ նիստը: Ժողովականները նախ ծանօթացան կատարուած աշխատանքներուն մասին տեղեկութիւններու, ապա արծարծեցին ձմեռնային խաղերու կազմակերպումի օրակարգային հարցերը՝ ներառեալ կոմիտէի կազմին մէջ փոփոխութիւնները, խաղերու խորհրդանիշի հաստատումը, խաղերուն յատուկ ենթակառոյցներու մշակումը եւ այլ նիւթեր: Ժողովականներուն որոշումով, խաղերու գլխաւոր իրաւարար նշանակուեցաւ Կրթութեան, գիտութեան, մշակոյթի եւ մարմնամարզի նախարարութեան, մարմնակրթութեան քաղաքականութեան վարչութեան պետի տեղակալ Դաւիթ Պաղումեանը: Յարութիւնեան ժողովականներուն յանձնարարեց Համահայկական ձմեռնային երկրորդ խաղերուն նախապատրաստութիւնները ամբողջացնել ըստ ճշդուած ժամանակացոյցին եւ լուծումներ գտնել ընթացիկ խնդիրները յաղթահարելու համար:
