Երեւանի մէջ իր հերթական ժողովը գումարեց Հայաստանի Անվտանգութեան խորհուրդը, գլխաւորութեամբ վարչապետ Նիկոլ Փաշինեանի ու ներկայութեամբ Խորհուրդի անդամներուն եւ Ազգային ժողովի նախագահ Ալէն Սիմոնեանի: Ժողովականները նիստին ընթացքին քննարկեցին արտաքին եւ ներքին քաղաքականութեան առնչուող զանազան հարցեր:
Վարչապետի աշխատակազմի ղեկավար, նախկին նախարար Արայիկ Յարութիւնեան ապա յայտնեց, որ Ատրպէյճանի հետ բոլոր հարցերը քննարկելի են: Պատասխանելով Հայաստանի Սահմանադրութիւնը փոխելու Պաքուի կոչերուն մասին հարցումի մը, Յարութիւնեան յստակացուց, որ ինք այդպիսի բան չէ յայտարարած, այլ կը շեշտէ, որ Հայաստան եւս ունի կարմիր գիծեր եւ բազմիցս յայտարարած է անոնց մասին: Մերժելով խօսիլ խաղաղութեան պայմանագրի հնարաւոր ստորագրումին մասին, նախկին նախարարը դիտել տուաւ, որ «մեծ պետութիւնները իրենց շահերը ունին բոլոր հոլովոյթներուն մէջ, սակայն կարեւոր է, որ Հայաստան կարենայ իր շահերը եւս յառաջ մղել»:
