Կիպրոսի նախագահ Նիկոս Խրիսթոտուլիտես որոշակի լաւատեսութիւն յայտնեց Լիբանանի մէջ զինադադար յայտարարելու հնարաւորութիւններուն առնչութեամբ: Անոր խօսքով, զինադադարի մը համաձայնութեան կարելի է յանգիլ մէկ կամ երկու շաբթուան ընթացքին:
Նոյն ծիրին մէջ երէկ հաղորդուեցաւ, որ ամերիկացի բանագնաց Ամուս Հոքշթայն գուցէ Պէյրութ վերադառնայ յառաջիկայ օրերուն, եթէ իսրայէլեան կողմէն ստանայ իր առաջարկներուն դրական արձագանգը: Ըստ «Արապիա» լրատուական ցանցին, վարչապետի պաշտօնակատար Նեժիպ Միքաթի ստացած է միջազգային երաշխիքներ, որ Իսրայէլ պիտի չթիրախաւորէ Լիբանանի հանրային ենթակառոյցները:
Սէուտական Արաբիոյ Արտաքին գործերու նախարարութիւնը, իր կարգին, հրաւէրներ ուղղեց արաբական ու մահմետական երկիրներուն՝ մասնակցելու Կազայի ու Լիբանանի պատերազմներուն նուիրուած քննարկումի մը, որ պիտի կազմակերպուի 11 Նոյեմբերին:
Իսկ Միացեալ Նահանգներու նախկին նախագահ եւ նախագահական թեկնածու Տոնըլտ Թրամփ ամերիկացի-լիբանանցիներուն կոչ ուղղեց քուէարկելու ի նպաստ իրեն, խոստանալով շուտով վերջ տալ կործանումին եւ լիբանանցիներու տառապանքին:
