Հըզպալլայի նորընտիր ընդհանուր քարտուղար շէյխ Նայիմ Քասէմ երէկ հանդէս եկաւ հեռասփռուած ուղերձով մը, որուն մէջ խօսեցաւ պատերազմի մանրամասնութիւններուն եւ յաջորդ փուլին մասին: Ան յստակացուց, որ ցարդ չէ առաջադրուած զինադադարի ծրագիր մը, որուն կը համաձայնի Իսրայէլ եւ քննարկելի կ’ըլլայ Հըզպալլայի համար: «Ամերիկեան նախագահական ընտրութիւնները պիտի ըլլան վճռորոշ», ըսաւ Քասէմ ու Լիբանանի մէջ Միացեալ Նահանգներու դեսպանին եւ իր հետ եղողներուն յայտնեց, թէ «նոյնիսկ իրենց երազներուն մէջ պիտի չտեսնեն Դիմադրութեան պարտութիւնը»: Յայտնելով, որ Հըզպալլա որոշած է այս պատերազմը անուանել «Ամէնէն խիզախներուն ճակատամարտը», Քասէմ վստահեցուց, որ բաւարար միջոցներ ունին մղելու երկարատեւ առճակատում: «Մենք չենք կռուիր որեւէ ուժի փոխարէն, այլ կը պայքարինք պաշտպանելու Լիբանանը, ազատագրելու բռնագրաւեալ հողը եւ աջակցելու Կազային՝ դէմ դնելով իսրայէլեան տարածաշրջանային վտանգին», շեշտեց Հըզպալլայի ընդհանուր քարտուղարը: Ան վերահաստատեց, որ իր կուսակցութիւնը կը շարունակէ ահաբեկուած ընդհանուր քարտուղար սեյիտ Հասան Նասրալլայի մշակած ծրագրերը՝ ռազմական, քաղաքական, ընկերային, մշակութային եւ այլ ոլորտներու մէջ: «Անոնք որոնք գրաւ դրած են մեր թուլութեան վրայ, կը վստահեցնենք, որ պատերազմէն ետք Հըզպալլա նոյնիսկ աւելի ուժեղ պիտի ըլլայ թէ՛ ռազմական, թէ՛ քաղաքական մակարդակներու վրայ», շեշտեց Նայիմ Քասէմ:
