Հըզպալլա յայտարարեց, թէ հարաւային Լիբանանի շարք մը շրջաններու՝ մասնաւորաբար Խիամ քաղաքին եւ մերձակայ շրջաններուն, նաեւ Քֆարքիլայի եւ Տէյր Միմէսի մէջ հրթիռային եւ հրետանային միջոցներու դիմած է՝ զսպելու համար իսրայէլեան ցամաքային շարժումները լիբանանեան շրջաններուն ուղղութեամբ եւ իսրայէլացի զինուորներու կուտակումները լիբանանեան հողի վրայ: Իսրայէլեան բանակն ալ խոստովանեցաւ, թէ անցնող 24 ժամերուն Լիբանանի մարտերուն ընթացքին վիրաւորուած է 10 սպայ եւ զինուոր: Իսկ իսրայէլեան լրատուամիջոցներ նշեցին, որ Հոկտեմբերին մահացած է 64 զինուոր եւ 16 քաղաքացի, որոնցմէ 33-ը՝ հարաւային Լիբանանի մարտերուն ընթացքին: Իսրայէլեան կողմը յայտարարեց նաեւ, թէ Նահարէայի ուղղութեամբ Հըզպալլայի արձակած անօդաչու սարքը ինկած է օդանաւերու կտորներ արտադրող գործարանի մը վրայ:
