Այս տարի եւս Պաթոն Ռուժի հայ համայնքը խանդավառութեամբ նշեց Հաճնոյ դիւցազնական հերոսամարտին 104-ամեակը։ Տիկիններ, խմբուելով տիկին Մարի Գալթաքճանին շուրջ, երեկոյեան եփուելիք աւանդական ճիտապուրին համար նախապատրաստեցին միսն ու կորկոտը։ Աղի օրհնութենէն ետք, խանդավառ մթնոլորտի մը մէջ, ժամեր շարունակ եփեցաւ ճիտապուրը, որուն կարեւոր գործառոյթներէն էր զայն խառնելը՝ տղամարդոց պատրաստակամ ծառայութեամբ։ Կիրակի, արդէն կանուխ ժամերուն ժողովուրդը խուռներամ հաւաքուած էր Սբ. Կարապետ Հայոց առաքելական եկեղեցւոյ կամարներուն տակ՝ մասնակցելու համար պատարագի եւ հոգեհանգստեան արարողութեան:
Օրուան պատարագիչն էր Նիւ Եորքէն ժամանած Հոգշ. Տէր Սիմէոն աբղ. Օտապաշեանը, որ աւելցուց արարողութեան շքեղութիւնը՝ միաժամանակ կատարելով Սբ. Էջմիածնէն ստացուած սրբալոյս միւռոնով ջրօրհնեաց հանդիսութիւն մը: Յաւարտ պատարագի, եկեղեցւոյ կից սրահին մէջ կատարուեցաւ ճիտապուր-մատաղի օրհնութեան կարգը։ Բոլոր ներկաները հիւրասիրուեցան համեղ ճիտապուրով եւ միչեւ յետմիջօրէի ուշ ժամերը անոնք տակաւին կը յամենային հայաշունչ ոգիով առլցուն համայնքային միջավայրին մէջ: Պաթոն Ռուժի եւ շրջակայից հայութիւնը այս տարի եւս պանծացուց Հաճնոյ հերոսամարտին 104-ամեակը եւ իր պապենական հողերուն վրայ նահատակուած քաջակորով հաճընցիներու անթառամ յիշատակը։ Բիւր յարգանք, խունկ եւ աղօթք անոնց պանծալի ու անմոռաց յիշատակին:
Ներկայ մը
(Արտատպուած «Մասիս»էն)
