«Հայաստանի Հանրապետութեան եւ Ատրպէյճանի Հանրապետութեան միջեւ պետական սահմանի սահմանազատումի եւ սահմանային անվտանգութեան հարցերու յանձնաժողովի ու հայ-ատրպէյճանական պետական սահմանի սահմանազատումի պետական յանձնաժողովի համատեղ գործունէութեան մասին» վիճայարոյց կանոնակարգը վերջապէս վաւերացուած է: Հայաստանի նախագահ Վահագն Խաչատուրեան կանոնակարգը ստորագրեց 24 Հոկտեմբերին, մինչ զայն նախապէս վաւերացուցած էր Ազգային ժողովը եւս, իսկ Սահմանադրական դատարանը եզրակացուցած էր, որ ան կը համապատասխանէ Հայաստանի Սահմանադրութեան:
Նշենք, որ կանոնակարգի վաւերացումը բուռն քննադատուած էր Հայաստանի ընդդիմադիր ուժերու կողմէ, որոնք կը հաւատան, թէ այս օրէնքը դուռ պիտի բանայ յաւելեալ զիջումներու: Ուստի, ընդդիմադիր «Սրբազան պայքար» շարժումը երէկ բողոքի նստացոյց կազմակերպեց Հանրապետութեան նախագահի նստավայրին առջեւ, նախագահ Խաչատուրեանէն պահանջելով չստորագրել կանոնակարգը, սակայն ապարդիւն:
Ատրպէյճանի նախագահ Իլհամ Ալիեւ եւս հրամանագիր ստորագրած է, որով հաստատած է Հայաստանի եւ Ատրպէյճանի սահմանազատման յանձնաժողովներու գործունէութեան կանոնակարգը:
