ՄԱԿ-ի բարձրաստիճան պատասխանատուներ դատապարտեցին լիբանանեւսուրիական սահմաններու շարունակական ռմբակոծումը: Իսկ ի տես լիբանանեան հիւանդանոցներու հետեւողական թիրախաւորումին, Պէյրութի մէջ ՄԱԿ-ի յատուկ յանձնակատարը յայտնեց, որ Լիբանան կը դիմագրաւէ աղէտալի մարդասիրական ճգնաժամ մը, կոչ ուղղելով հիւանդանոցները պաշտպանելու պատերազմի վտանգաւոր հետեւանքներէն:
Միացեալ Թագաւորութեան պաշտպանութեան նախարար Տէյվիտ Լամի վստահեցուց, որ Լոնտոն կը շարունակէ աջակցիլ լիբանանեան բանակին: Ան նաեւ խոստացաւ շարունակաբար աշխատիլ՝ Լիբանանի հարաւային սահմանին վրայ անյապաղ զինադադար յայտարարելու ուղղութեամբ: Նախարարը կը խօսէր բրիտանական բանակէն լիբանանեան բանակին տրամադրուած բժշկական եւ մարդասիրական օգնութիւններու փոխանցումի լոյսին տակ: Իսկ Ֆրանսայի Արտաքին գործերու նախարարութիւնը 1701 բանաձեւը համարեց լաւագոյն միջոցը՝ ապահովելու թէ՛ Իսրայէլի անվտանգութիւնը, թէ՛ Լիբանանի գերիշխանութիւնն ու միասնութիւնը: Եւրոմիութեան արտաքին եւ անվտանգութեան քաղաքականութեան գերագոյն ներկայացուցիչ Ժոզեփ Պորել իր կարգին ահազանգեց, որ Լիբանանի մէջ մրցավազք է ժամանակի դէմ, պահանջելով անյապաղ գործադրել 1701 բանաձեւը: Միացեալ Նահանգներու Սպիտակ տունը յայտարարեց, թէ Իսրայէլին փոխանցած է իր մտահոգութիւնը՝ Պէյրութի հետեւողական թիրախաւորումին առնչութեամբ, նկատի առնելով անոր խիտ բնակչութիւնը: Իսկ Իրանի իսլամական յեղափոխութեան հոգեւոր գերագոյն առաջնորդը հաւաստիացուց, որ Հըզպալլա տակաւին ուժեղ է ու կը մնայ Լիբանանը պաշտպանող կարեւորագոյն ուժը:
