Վարչապետի պաշտօնակատար Նեժիպ Միքաթի առաջնահերթ համարեց զինադադարը եւ իսրայէլեան բռնարարքներու դադրեցումը, մանաւանդ որ աւելի քան 1 միլիոն 400 հազար լիբանանցի տեղահանուած է իր բնակարաններէն եւ ապաստանած աւելի ապահով շրջաններ: «Իսրայէլ կը խախտէ միջազգային օրէնքը, բռնութիւն գործադրելով քաղաքացիներու, լրագրողներու եւ շտապ օգնութեան խումբերու նկատմամբ», ըսաւ Միքաթի՝ Միացեալ Նահանգներու արտաքին գործերու նախարար Անթոնի Պլինքընի հետ տեսակցութեան ընթացքին: Ան Լիբանանի ամբողջական յաձնառութիւնը յայտնեց ՄԱԿ-ի 1701 բանաձեւին, կոչ ուղղելով նոյնը ակնկալել նաեւ Իսրայէլէն, որ նախապէս դրժած է ամերիկեան-ֆրանսական կոչը գործադրելու իր խոստումը: Լոնտոնի մէջ կայացած հանդիպումէն ետք, Պլինքըն իր կարգին անհրաժեշտ համարեց զինադադարի յայտարարութիւնն ու հակամարտութեան դիւանագիտական հանգուցալուծումը՝ գործադրելով 1701 բանաձեւին բոլոր յօդուածները:
Խորհրդարանի նախագահ Նեպիհ Պըրրի իր կարգին շնորհակալութիւն յայտնեց Ֆրանսային ու բոլոր այն երկիրներուն, որոնք մասնակցեցան Լիբանանին աջակցող ժողովին, մաղթելով որ միջազգային ընտանիքը իրապէս կը գործադրէ ժողովին որոշումները:
