Լիբանանի հարաւային շրջաններուն մէջ գործող լրագրողներու դիտումնաւոր եւ հետեւողական հետապնդումի լոյսին տակ, «Արարատ» խստիւ կը դատապարտէ իրենց աշխատանքային պարտականութիւնները կատարող լիբանանեան եւ օտարերկրեայ լրատուամիջոցներու ներկայացուցիչներուն թիրախաւորումը, զայն համարելով լրատուական գործունէութիւնը կազմակերպող միջազգային բոլոր սկզբունքներու, նաեւ մարդասիրական օրէնքներու բիրտ ոտնակոխում: Ցաւակցելով նահատակ լրագրողներու հարազատներուն եւ բարի ապաքինում մաղթելով վիրաւորներուն, «Արարատ» կը յիշեցնէ, որ ռազմական գօտիին վրայ գործող լրագրողները առաջին հերթին քաղաքացիներ են, ոչ թէ ռազմական տարրեր, որոնք կը կատարեն իրադրութիւնն ու իրականութիւնը ակնդիրներուն, ունկնդիրներուն եւ ընթերցողներուն փոխանցելու իրենց աշխատանքային պարտականութիւնը, ուստի անոնց թիրախաւորումը կը համարուի խաղաղ բնակչութեան դէմ գործուած ոճիր, որ արժանի է միջազգային ոչ միայն լոկ քննադատութեան եւ մտահոգութեան, այլեւ գործնական պատիժներու՝ կանխելու համար նման միջադէպերու կրկնութիւնը:
