Մարդասիրական միջազգային բոլոր ուխտերու, նոյնիսկ պատերազմի օրէնքներու բացայայտ խախտումներով կը շարունակուին Լիբանանի դէմ իսրայէլեան ռազմական գործողութիւնները, կտրականապէս անտեսելով հանդարտութեան եւ զինադադարի միջազգային՝ ընդ որում դաշնակիցներու կոչերը: Առողջապահութեան նախարարութեան արտակարգ իրավիճակներու կեդրոնը երէկ հաղորդեց, թէ երեք լրագրող զոհուած է Հասպայայի իրենց կեցութեան վայր պանդոկի թիրախաւորումին պատճառով: «Մայատին» հեռատեսիլի կայանէն Ղասսան Նաժժար եւ «Մանար»-էն Ուիսամ Քասէմ հարաւ կը գտնուէին՝ լուսաբանելու պատերազմը եւ բացայայտելու իսրայէլեան ոճրագործութիւնները: Նոյն հարուածէն վիրաւորուած են նաեւ երեք լրագրողներ: Տեղեկատուութեան նախարարի պաշտօնակատար Զիատ Մաքարի պատերազմի ոճիր համարեց լրագրողներու ահաբեկումը, նշելով որ այդ կատարուած է հետեւողական հետապնդումներէ ետք: Լրագրողներու սպանութիւնը դատապարտեցին նաեւ լիբանանեան քաղաքական կուսակցութիւններ եւ անձնաւորութիւններ, ինչպէս նաեւ լրատուական հաստատութիւններ: Լրագրողներու թիրախաւորումը արժանացաւ նաեւ միջազգային խիստ դատապարտումի: ՄԱԿ-ի մարդու իրաւունքներու յանձնակատարի գրասենեակը յիշեցուց, որ լրագրողները քաղաքացիներ են եւ միջազգային օրէնքով պէտք է զանոնք պաշտպանել բոլոր հակամարտութիւններուն ընթացքին:
Առողջապահութեան նախարարի պաշտօնակատար Ֆիրաս Ապիատ յայտնեց, որ պատերազմի սկիզբէն ի վեր զոհուած է 11 լրագրող, ութ վիրաւորներու կողքին: Միջազգային օրէնքի բացայայտ խախտում համարելով իսրայէլեան գործողութիւնները, Ապիատ ահազանգեց, թէ ցարդ զոհուած է առողջապահական համակարգի 151 աշխատակից, իսկ շտապ օգնութեան խումբերէն ծառայող ութ նահատակներ տակաւին կը գտնուին թիրախաւորուած ինքնաշարժներուն մէջ, սակայն իսրայէլեան բանակը չ’արտօներ մօտենալ անոնց եւ տարհանել զոհերուն մարմինները: «Ցարդ գրանցած ենք 55 յարձակում լիբանանեան հիւանդանոցներուն վրայ, որոնցմէ 36-ը՝ ուղղակի թիրախաւորում էր», ըսաւ Ապիատ, միջազգային ընտանիքէն պահանջելով անյապաղ վերջ տալ իսրայէլեան ոճիրներուն:
Իսրայէլեան բանակի բանբեր Աւիխայ Ատրահի միւս կողմէ շտապ օգնութեան խումբերը զգուշացուց Հըզպալլայի հետ համագործակցելու վտանգներէն: Պնդելով, որ «Հըզպալլա շտապ օգնութեան մեքենաները կը գործածէ զէնք եւ զինեալներ փոխադրելու համար», իսրայէլացի բանբերը սպառնաց այսուհետեւ ռմբակոծել նաեւ այդ կասկածելի մեքենաները:
Իսրայէլեան ուժերը ռմբակոծեցին նաեւ հարաւային Խըրպէթ Սըլմ, Խիամ, Մանսուրի եւ Քֆարհունա գիւղերը, պատճառելով չորս զոհ եւ քանի մը վիրաւոր: ԵՈՒՆԻՖԻԼ եւս զերծ չմնաց իսրայէլեան կրակոցներէն: Խաղաղապահ ուժերու բանբերը յայտնեց, որ իրենց կեդրոնները իսրայէլեան թիրախաւորումի ենթարկուած են Եարին, Պէյթ Լէյֆ եւ Քֆարշուպա գիւղերուն մէջ: Շտապ գործողութիւններու լիբանանեան կեդրոնին համաձայն, 24 ժամերու մէջ արձանագրուած է իսրայէլեան 125 օդային հարուած, պատճառելով 41 զոհ եւ 133 վիրաւոր:
Իսկ Սուրիոյ հետ սահմանագիծին վրայ, իսրայէլեան օդուժը երէկ հարուածեց Հըրմէլի Ժուսիէ անցակէտը՝ Հըզպալլային պատկանող ենթակառոյցներ թիրախաւորելու պատրուակով: Երէկ եւ նախանցեալ օր գիշերուայ ժամերուն ծանրօրէն ռմբակոծուեցան նաեւ Պէյրութի հարաւային արուարձանները:
