Միացեալ Նահանգներու արտաքին գործերու նախարար Անթոնի Պլինքըն յայտնեց, որ ինք կ’ակնկալէ, որ բանակցող կողմերը յառաջիկայ օրերուն պիտի հանդիպին՝ քննարկելու համար Կազայի մէջ հրադադար հաստատելու օրակարգը:
Ան Տոհայի մէջ Քաթարի վարչապետ եւ արտաքին գործերու նախարար Մոհամմատ պըն Ապտըլ Ռահմանի հետ միացեալ մամլոյ ասուլիսի ընթացքին նշեց, որ իրենք պէտք է շարունակեն ծրագիր մշակել պատերազմի աւարտէն ետք մինչեւ Իսրայէլի դուրս գալը Կազայէն: Ան աւելցուց, որ կարեւոր պահ է, որովհետեւ Իսրայէլ հասաւ իր առջեւ դրուած ռազմավարական նպատակներուն, ընդ որում նաեւ աշխատանք պէտք է կատարուի ապահովելու գերիներու վերադարձը իրենց տուները եւ աւելի լաւ ապագայ կերտելու Կազայի ժողովուրդին համար:
Պլինքըն յայտնեց նաեւ, որ անհրաժեշտ է Կազայի կարիքաւոր ժողովուրդին օգնութիւն ապահովել, եւ ըսաւ, որ Միացեալ Նահանգներու պաշտպանութեան նախարար Լոյտ Օսթին եւ ինք Իսրայէլէն խնդրեցին ճշգրիտ ընթացակարգեր ճշդել՝ Կազայի կարիքաւորներուն օգնութիւն հասցնելու համար:
Բացի ատկէ, ան նշեց, որ իրենք կը փափաքին, որ տարածաշրջանին մէջ հետագայ լուրջ լարուածութեան մագլցում չտեսնեն: Իրենք կը պաշտպանեն Իսրայէլի իրաւունքը՝ պաշտպանուելու Իրանի դէմ եւ չեն փափաքիր լարուածութեան արտասովոր մագլցում տեսնել շրջանին մէջ:
Լիբանանի վերաբերեալ Պլինքըն պնդեց, որ իրենք պէտք է երաշխաւորեն, որ Իսրայէլ շարունակական արշաւ չսկսի Լիբանանի մէջ, եւ ըսաւ, որ բազմաթիւ ճիգեր կը թափուին դիւանագիտական լուծման յանգելու համար Լիբանանի մէջ, որ կ’արտօնէ 1701 բանաձեւին գործադրութիւնը: Ան յայտնեց, որ Քաթար կարեւոր օգնութիւն ցուցաբերած է լիբանանեան բանակին, ինչպէս ամսաթոշակներն ու վառելանիւթը, եւ աւելցուց, որ կը փափաքին լրացնել նախագահական թափուր աթոռի հարցը Լիբանանի մէջ։
