Նախանցեալ գիշեր իսրայէլեան օդուժը Պէյրութի հարաւային արուարձաններուն վրայ գործեց 17 յարձակում: Իսրայէլեան նախայարձակումներուն եւ թշնամական գործողութիւններուն սկիզբէն արձանագրուած է 2574 զոհ եւ 12.001 վիրաւոր:
Դիմադրութիւնը երէկ հրետանային հրթիռներով թիրախաւորեց իսրայէլեան ուժերը Այթարուն գիւղաքաղաքին մօտակայքը եւ Հըպպարիէ շրջանը:
Լիբանանեան բանակը յայտարարեց, որ հարաւային Լիբանանի Եաթեր գիւղի մօտ իսրայէլեան բանակը յարձակում գործեց լիբանանեան բանակի զինուորներու վրայ, որոնք վիրաւորներուն կ’օգնէին: Երեք զինուոր, ներառեալ սպայ մը, նահատակուած են:
Իսրայէլ Քահալէի մէջ թիրախաւորեց «Թոյոթա» տիպի ինքնաշարժ մը: Արձանագրուեցան երկու զոհ եւ երկու վիրաւոր: Ըստ «Սքայ Նիուզ»-ի իսրայէլեան չորս հրթիռներ թիրախաւորեցին Ճիպէյլի Ժըրտ Ալմաթ շրջանը:
Դիմադրութիւնը իսրայէլեան ուժերու հետ զերօ հեռաւորութեան վրայ բուռն մարտեր մղեց Այթա Շաապի մէջ: Բուռն մարտերու մէջ «Միրքաւա» տիպի հրասայլ մը օգնութեան հասնելու ընթացքին քանդուած է: Կան զոհեր եւ վիրաւորներ: Պեքաայի Խտըր գիւղի մէջ հրթիռարձակման հետեւանքով արձանագրուեցան 7 զոհ եւ 14 վիրաւոր: Իսրայէլեան բանակը յայտարարեց, որ Լիբանանէն 50 հրթիռ արձակուած է Գալիլիոյ ուղղութեամբ:
