Ամերիկեան «Տը Թայմըզ» օրաթերթը, իր տեղեկութիւնները քաղելով հետախուզական իրազեկ աղբիւրէ, յայտնեց, որ Իսրայէլ յետաձգած է Իրանին ուղղուած պատասխան յարձակումը ամերիկեան փաստաթուղթերու սպրդումի պատճառով։ Աղբիւրը պարզաբանեց, որ Իրանին պատասխանելու Իսրայէլի ուշացումը պայմանաւորուած է որոշ ռազմավարութիւններ փոխելու անհրաժեշտութեամբ։
Ամերիկացի հետաքննիչները կը փորձեն բացայայտել, թէ ինչպէս երկու «յոյժ գաղտնի հետախուզական փաստաթուղթեր» սպրդած են առցանց եւ յայտնուած են Telegram յաւելուածին մէջ: Փաստաթուղթերը կը պարունակեն Միացեալ Նահանգներու ենթադրեալ գնահատականը Իրանի վրայ յարձակելու Իսրայէլի ծրագրերու վերաբերեալ՝ հիմնուած արբանեակային պատկերներու եւ հետախուզական այլ տեղեկատուութեան վրայ: Միացեալ Նահանգներու նախագահ Ճօ Պայտըն իր խոր մտահոգութիւնը յայտնեց այս սպրդումին առնչութեամբ, ըսաւ Ազգային անվտանգութեան խորհուրդի խօսնակ Ճոն Քիրպի։ Ան աւելցուց, որ պաշտօնատարները դեռ չեն կողմնորոշուած, որ փաստաթուղթերու արտահոսքը հաքերային յարձակման կամ ներքին սպրդումի հետեւանք եղած է։
