Վարչապետի պաշտoնակատար Նեժիպ Միքաթին նշեց, որ առաջնահերթութիւնը հրադադարի հաստատումն է եւ այնուհետեւ 1701 բանաձեւի գործադրումը, ապա բանակին հարաւային Լիթանիի մէջ տեղակայումը եւ անոր ու ԵՈՒՆԻՖԻԼ-ի դերին ամրապնդումը: Ան աւելցուց, որ պէտք է հանրապետութեան նախագահ ընտրուի եւ նոր կառավարութիւն կազմուի՝ բարեփոխումներ իրականացնելու համար։
Լիբանանին աջակցելու Փարիզի վեհաժողովի շրջանակին մէջ իր կատարած յայտարարութեան մէջ Միքաթի նշեց, որ միջազգային մեծ ճնշում կայ Իսրայէլի վրայ, եւ հրադադարի հաստատումը իր ձեռքը չէ եւ ոչ ալ իրենց զօրակցող երկիրներուն ձեռքը, այլ՝ Իսրայէլի: Ան ըսաւ, որ Ֆրանսայի նախագահը իր ամէն կարելին եւ ինչ որ անհրաժեշտ է կատարեց, Մաքրոն մտահոգուած է Լիբանանի հարցով: Միքաթի իր շնորհակալութիւնը յայտնեց բոլոր անոնց, որոնք իրենց ներդրումը ունեցան այս վեհաժողովի կայացման յաջողութեան մէջ։ Միքաթի ընդգծեց, որ մարդասիրական օժանդակութիւնը բաւարար չէ, որովհետեւ մարդոց առաջին հերթին պէտք է պաշտպանել: Ան ըսաւ, որ իրենց հիմնական պահանջը հրադադարն է։
