Այս անգամ պարոն Կարօ Աբրահամեանն էր, որ մեզ պատուեց իր այցելութեամբ:
Մատենագէտ եւ բանասէր Կարօ Աբրահամեան ծանօթ եւ յարգելի անուն մըն է գաղութիս մէջ, համեստ ծառայ մը ըլլալով հայ մամուլին եւ գրականութեան։ Պարոն Աբրահամեանի այցելութիւնը չընկալեցինք որպէս հիւրի, այլ՝ «Արարատ»ի մէկ հարազատ մասնիկի: Չէ՞ որ ան ամէն տեղ է, հոն ուր կայ գիր ու բան, Կարօն ներկայ է: Յիշենք նաեւ, որ Իսթանպուլի ծնունդ բանասէրը աշխատակցած է զանազան օրաթերթերու, ամսաթերթերու, տարեգիրքերու, այդ շարքին նաեւ՝ «Արարատ»ին։ Օգտաշատ աշխատանք մը կը կատարէ պարոն Աբրահամեանը իր ազնուափայլ տիկնոջ՝ Վերժինին հետ միասին, հետեւողականօրէն հրատարակելով մանկապատանեկան «Փթիթ» պարբերաթերթը:
Պարոն Աբրահամեան հեղինակն է «Ժամանակակից Իսթանպուլահայ Գրողներ» Ա. եւ Բ. հատորներուն: Իրմէ իմացանք, որ մեկենասի մը որոնման զուգընթաց մօտալուտ պիտի ըլլար նաեւ երրորդ հատորին հրատարակութիւնը:
Սրտանց յաջողութիւն կը մաղթենք յարգելի մատենագէտին: Թող հայ մամուլին ու «գրիչ»ներուն հանդէպ իր որոնողական աշխուժ ջանքերը բնաւ չդադրին:
