Յաջորդական երկու օրերու վրայ երկարող յիշատակի արարողութիւններով, Ֆրանսայի մայրաքաղաք Փարիզի շրջանի Հաճնոյ Հայրենակցական Միութեան վարչութեան կազմակերպութեամբ այս տարի եւս արժանաւայել ձեւով յարգուեցաւ յիշատակը այն բիւրաւոր նահատակներուն, որոնք ինկան 1920 թուականին պատմական Հաճնոյ մէջ ութամսեայ գոյամարտի ընթացքին:
Արդարեւ, Շաբաթ, 19 Հոկտեմբերին, Հայ Երիտասարդական Կեդրոնին մէջ Նոր Սերունդ Մշակութային Միութեան «Կայծ» վարչութեան անդամ-անդամուհիներուն ձեռամբ տեղի ունեցաւ ճիտապուրի պատրաստութիւնը:
Իսկ յաջորդ առաւօտ՝ Կիրակի, 20 Հոկտեմբերին, Ալֆորվիլի Սուրբ Պօղոս եւ Պետրոս եկեղեցւոյ մէջ, յաւարտ սուրբ պատարագի, արժանապատիւ Տ. Տիրայր քահանայ Քէլէճեան կատարեց հոգեհանգստեան պաշտօնը:
Այնուհետեւ Հայ Երիտասարդական Կեդրոնին մէջ հոգեճաշ՝ Հաճնոյ Հայրենակցական Միութեան վարչութեան կազմակերպութեամբ եւ մօտ 65 հայրենակիցներու ներկայութեամբ:
Հոգեճաշի բացումը հակիրճ խօսքով կատարեց Հաճնոյ Հայրենակցական Միութեան անդամուհի՝ հայրենակցուհի Արմիկ Տագէսեան-Մկրտիչեանը: Ապա բարիգալստեան եւ սրտի խօսքերով հանդէս եկան Հաճնոյ Հայրենակցական Միութեան ատենապետ հայրենակից տոքթ. Յակոբ Գրքեաշարեանը, հայրենակից Գէորգ Սաչլեանը եւ հայրենակցուհի Հայկանուշ Գրքեաշարեանը:
