Ինչպէս յայտնի է, ատենէ մը ի վեր «Արարատ» լոյս կ’ընծայուէր շաբաթական երկու տպագիր թիւով: Մնացեալ չորս հրատարակումները կը սփռուէին որոշ ընթերցողներու համար անպատշաճ կամ ոչ-հասանելի՝ համացանցային եւ PDF եղանակով միայն:
Ուրախութեամբ կը յայտարարենք, որ փոքր ոստում մը կատարելով, Երեքշաբթի՝ 29 Հոկտեմբերէն սկսեալ թերթը լոյս պիտի տեսնէ շաբաթական երեք անգամ միայն՝ Երեքշաբթի, Հինգշաբթի եւ Շաբաթ օրերը, թէ՛ տպագիր եւ թէ՛ համացանցային եղանակներով:
Այս քայլը թէեւ թերթիս պիւտճէին համար նիւթական յաւելեալ պատասխանատու բեռ կ’ենթադրէ, սակայն յոյսով ենք, որ Ս.Դ.Հ.Կ.-ի Լիբանանի շրջանի Վարիչ մարմնոյ Մամլոյ դիւանին հետ համախորհուրդ, զայն ոչ միայն պիտի յաղթահարենք, այլ մեր ազնիւ ընթերցողներուն, բարեկամներուն եւ բարերարներուն քաջալերանքով, մօտ ապագային «Արարատ»-ը հերթաբար պիտի հրատարակենք շաբթուան բոլոր օրերուն՝ տպագիր հրապարակումով:
ՏՆՕՐԷՆՈՒԹԻՒՆ
