Արտաքին գործերու նախարարութիւնը ողջունեց մեծ տնտեսութիւններու եօթնեակի նախարարական ժողովէն բխած հաղորդագրութեան Լիբանանին վերաբերող հատուածը, ուր կոչ կ’ուղղուի անյապաղ յայտարարելու զինադադար եւ յանձնառու մնալու հակամարտութեան դիւանագիտական լուծումին՝ գործադրելով ՄԱԿ-ի 1701 բանաձեւը: Յայտարարութիւնը կը կարեւորէ նաեւ ԵՈՒՆԻՖԻԼ-ի ուժերուն առաքելութիւնը, պահանջելով խաղաղապահները զերծ պահել ռազմական գործողութիւններու վտանգներէն ու պաշտպանել քաղաքացիները:
Լիբանանեան ուժեր կուսակցութեան նախագահ Սամիր Ժաաժա խորհրդարանի նախագահ Նեպիհ Պըրրին եւ վարչապետի պաշտօնակատար Նեժիպ Միքաթին ամբաստանեց 1559 եւ 1680 բանաձեւերու գործադրութենէն խուսափելու մէջ: «Անոնք չեն ուզեր պահանջել Հըզպալլայի ապազինումը», ըսաւ Ժաաժա եւ կարծիք յայտնեց, որ այժմու պատերազմը Իսրայէլի եւ Իրանի միջեւ է: Ան կառավարութենէն պահանջեց յանձնառու մնալ միջազգային որոշումներուն՝ խուսափելու համար աւելի մեծ աղէտէ մը: «Պէտք է գործադրել 1559 բանաձեւը եւ ապազինել զինուած ապօրինի կազմակերպութիւնները», պահանջեց Ժաաժա եւ յիշեցուց, որ ինք պատերազմէն առաջ ահազանգած էր գալիք վտանգէն, Միքաթիէն պահանջելով անկեղծ խօսիլ Հըզպալլայի հետ ու գործադրել Թայէֆի համաձայնութիւնը, «որովհետեւ եթէ լիբանանեան բանակը տեղակայուած ըլլար սահմանային նոյն դիրքերուն մէջ, ապա Իսրայէլ պիտի չյարձակէր Լիբանանի վրայ»:
Նախկին նախագահներ Միշէլ Սլէյման եւ Էմին Ժմայէլ ու նախկին վարչապետ Ֆուատ Սինիորա դրուատեցին լիբանանեան հարցերուն Իրանի միջամտութիւնները դատապարտող վարչապետի պաշտօնակատար Նեժիպ Միքաթիի դիրքորոշումները: Պիքֆայայի մէջ գումարուած ժողովէն ետք, նախկին պաշտօնատարներու եռեակը կարեւորեց լիբանանեան միասնականութիւնը եւ ներքին կայունութեան պահպանումը, որպէսզի կարելի ըլլայ նախ կեդրոնանալ երկիրը փրկելու ջանքերուն վրայ, պահանջելով անյապաղ վերջ տալ իսրայէլեան սպանդներուն: Սլէյման, Ժմայէլ եւ Սինիորա հրապարակեցին հինգ կէտերէ բաղկացած աշխատանքային ծրագիր մը, որ կը ներառէ զինադադարի անյապաղ յայտարարութիւն, ՄԱԿ-ի 1701 բանաձեւի ամբողջական գործադրութիւն, հանրապետութեան նոր նախագահի ընտրութիւն ու վերջապէս պետական հաստատութիւններու եւ անոնց գործունէութեան վերականգնում:
