Մեթնի Ռապուէ շրջանի մերձակայ անտառներուն մէջ երկու օր առաջ բռնկած հսկայական հրդեհը տակաւին մինչեւ երէկ գիշեր ամբողջովին մարած չէր: Իսկ երէկ առաւօտեան կանուխ ժամերուն, հրդեհ մը վերաբռնկեցաւ մօտակայ Ժուրէթ Պալլութ շրջանի անտառներուն մէջ եւ արագօրէն տարածուեցաւ քամիին պատճառով: Քաղաքացիական անվտանգութեան ծառայութենէն բազմաթիւ խումբեր ժամեր շարունակ աշխատանք տարին հակակշիռի տակ առնելու կացութիւնը՝ բանակէն ուղղաթիռներու օգնութեամբ, որոնք միջամտեցին, նկատի առնելով հրդեհային գօտիի աշխարհագրական դժուարութիւնները: Մինչ յետմիջօրէին կը թուէր, թէ հրշէջները հակակշիռի տակ առած են կացութիւնը, երեկոյեան ժամերուն վերսկսան ուղղաթիռներու թռիչքները: Մեթնի երեսփոխաններէն Իպրահիմ Քանաան չբացառեց դիտումնաւոր հրահրումի հաւանականութիւնը եւ ապահովութեան ուժերէն պահանջեց բոլոր միջոցներով աշխատանք տանիլ՝ բացայայտելու հրդեհին դրդապատճառներն ու ձերբակալելու յանցագործները:
Այլ գիծի վրայ, երէկ առաւօտեան հրդեհ մը բռնկեցաւ Ժըսր Պաշա շրջանի «Ուարաք էլ-Շամ» տպարանին մէջ, ուր իսկոյն փութացին քաղաքացիական անվտանգութեան ծառայողները եւ աշխատանք տարին նախ հակակշիռի տակ առնելու առաջին յարկը, ուր հրդեհին պատճառով պայթած էին վառելանիւթի պահեստներ: Հրշէջները ապա անցան կառոյցի մնացեալ չորս յարկերուն՝ տարհանելէ ետք պաշտօնեաներն ու աշխատաւորները: Այսուհանդերձ, փրկարարները գործարանին մէջ յայտնաբերեցին հրդեհէն բարձրացած ծուխին պատճառով շնչահեղձ եղած հինգ պաշտօնեայի մարմինները, մինչ մարդ մը կրեց այրուածքային վնասուածք եւ փոխադրուեցաւ հիւանդանոց:
