Հըզպալլա երէկ պաշտօնապէս գուժեց կուսակցութեան Քաղաքական խորհուրդի նախագահ եւ սեյիտ Հասան Նասրալլայի զարմիկ՝ սեյիտ Հաշէմ Սաֆիտտինի մահը, որ պատահեցաւ իսրայէլեան ծանր ռմբակոծումի հետեւանքով: Հըզպալլայի հրապարակած գոյժին մէջ նշուեցաւ, որ Սաֆիտտին իր ամբողջ կեանքը նուիրած էր Դիմադրութեան շարժումին եւ ծառայած կուսակցական զանազան մարմիններու մէջ, միշտ կանգնելով մարտիկներուն կողքին եւ աջակցելով նահատակներու ընտանիքներուն: «Մեր մեծ նահատակին ու անոր ընկերակիցներուն կը խոստանանք շարունակել դիմադրութեան եւ ժիհատի ուղին՝ մինչեւ ազատութեան եւ յաղթանակի նպատակներու իրականացում», յայտարարեց Հըզպալլա: Այս պաշտօնական գոյժէն քանի մը ժամ առաջ իսրայէլեան կողմը վերստին յայտարարած էր Սաֆիտտինը եւ անոր հետ Հըզպալլայի հետախուզական թեւի կեդրոնին մէջ գտնուող աւելի քան 25 մարդ ահաբեկելու մասին: Յիշեցնենք, որ իսրայէլեան օդուժը նշեալ կեդրոնը հարուածած էր 4 Հոկտեմբերին եւ յայտարարած, թէ յարձակումին գլխաւոր թիրախը Հաշէմ Սաֆիտտինն է, որ օրին կը համարուէր Հըզպալլայի ընդհանուր քարտուղարութեան պաշտօնը ստանձնելու գլխաւոր թեկնածուն, սակայն Հըզպալլայէն պատասխանատուներ գրեթէ երեք շաբաթ ոչ հաստատեցին, ոչ ժխտեցին Սաֆիտտինի ահաբեկումին լուրը, շեշտելով որ օդային հարուածներու շարունակութեան պատճառով կարելի չէր հասնիլ ռմբակոծուած կեդրոնի անոր գտնուած վայրը:
