Կազայի մէջ 7 Հոկտեմբեր 2023-էն ի վեր շարունակուող պատերազմին մասնակցող հազարաւոր իսրայէլացի զինուորներ կը տառապին ծանր հոգեբանական խանգարումներէ, անոնցմէ ոմանք յանգելով անձնասպանութեան։ Իսրայէլի բանակի ղեկավարութիւնը յայտարարեց, որ հոգ կը տանի հազարաւոր զինուորներու առողջութեան, որոնք կը տառապին ճնշուածութենէ կամ հոգեկան հիւանդութենէ, պատերազմի ժամանակ իրենց ստացած վէրքերէն: Բանակը պաշտօնական թիւ չէ յայտարարած, թէ քանի զինուոր անձնասպան եղած է:
«Սի.Էն.Էն.» հրատարակեց հաղորդագրութիւն մը, ուր կը հաստատէ Կազայի կռիւներէն վերադարձած զինուորներու մօտ հոգեբանական ազդեցութիւնը եւ անձնասպանութեան դէպքերու տարածումը: Զինուորները կը պատմեն, որ ականատես եղած են այնպիսի տեսարաններու, որ արտաքին աշխարհը չի կրնար լրիւ հասկնալ: Անոնք խօսեցան նաեւ պատերազմի դաժանութեան մասին եւ շեշտեցին որ Իսրայէլի վարչապետ Պենիամին Նեթանիահուն քննադատողները կ’ըսեն, որ ան կը ցանկայ «անվերջ» պատերազմ, եւ անոր անուղղակի գինը կը վճարեն մասնակից զինուորները:
Կազայի դէմ իսրայէլեան պատերազմը կը նկատուի ամէնէն երկարատեւ պատերազմը, որ Իսրայէլ վարած է իր հիմնադրութենէն ի վեր: Իսրայէլեան բանակի բժիշկը, Կազայի մէջ չորս ամիս ծառայելէ ետք, առանց իր անունը նշելուտ ըսաւ, որ իրենցմէ շատեր կը վախնան կրկին զօրակոչուիլ Լիբանանի մէջ պատերազմի մասնակցելու համար: Իրենցմէ շատեր վստահութիւն չունին ներկայ կառավարութեան:
