Ֆրանսայի պաշտպանութեան նախարար Սեպասթիեն Լըքորնիու նկատեց, որ Լիբանանի մէջ զինադադարի ձեռքբերումը անհրաժեշտութիւն է բոլորին հաւաքական անվտանգութեան համար՝ զգուշացնելով այս երկրի փլուզման եւ այնտեղ բռնկուելիք մօտակայ քաղաքացիական պատերազմի վտանգի մասին։
«Էլ.Սի.Էյ.» պատկերասփիւռի կայանին տուած յայտարարութեան մէջ ֆրանսացի նախարարը բացատրեց, որ ներկայիս իրենց դիրքորոշումը հիմնուած է յատկապէս Լիբանանի մէջ մօտալուտ քաղաքացիական պատերազմի բռնկման վախի վրայ: Ան յայտնեց իր նախազգուշացումը՝ նկատի ունենալով տեղահանուած համայնքները եւ անոնց միջեւ գոյութիւն ունեցող լարուածութիւնը, Հըզպալլայի տկարացումը, ինչ որ լաւ նորութիւն է: Ան աւելցուց, որ իրենք արդէն կը տեսնեն, որ Լիբանանը կրնայ որոշ ժամանակ անց փլուզուիլ:
Լիբանանի մէջ ՄԱԿ-ի խաղաղապահ ուժերուն վերաբերեալ Լըքորնիու իր ափսոսանքը յայտնեց, որ Իսրայէլի բանակը միշտ չէ, որ անհրաժեշտ անվտանգութեան միջոցներ կը ձեռնարկէ իր յարձակումներուն համար։ Ան ըսաւ, որ Հըզպալլա կ’օգտագործէ ԵՈՒՆԻՖԻԼ-ի ստորաբաժանումները իբրեւ ծածկոյթ իր յարձակումներուն ընթացքին, սակայն յիշեցուց, որ այդ ուժերու դիրքերը ուղղակիօրէն թիրախաւորուեցան անցեալ շաբաթ իսրայէլեան բանակին կողմէ։
Նախարարը ընդգծեց, որ որոշակի թիւով «ահաբեկիչներու» չէզոքացման միջոցով մարտավարական յաղթանակներու յաջորդականութիւնը, որուն համար իրենք չեն զղջար, Իսրայէլի անվտանգութեան յստակ ու անվտանգ հեռանկարներ չեն ապահովեր միջնաժամկէտ եւ երկարաժամկէտ հեռանկարով։
