Իրանի արտաքին գործերու նախարար Ապպաս Արաքճի նշեց, որ յարձակման շարունակութիւնը նպատակ ունի մնացեալ տարածքները վերածել երկրորդ, երրորդ եւ չորրորդ Կազայի: Ան բացատրեց, որ ինք հանդիպումներ ունեցած է դրացի երկիրներու շարք մը ղեկավարներու հետ եւ բոլորը համաձայնած են պատերազմէն խուսափելու անհրաժեշտութեան մասին։
Ան ընդգծեց, որ եթէ թշնամի Իսրայէլը շարունակէ իր յարձակումները, իրենք պիտի պատասխանեն անոնց: Իրան պատերազմ չի փափաքիր տարածաշրջանին մէջ, սակայն պատրաստ է պատերազմի։ Ան նշեց, որ իրենք ամէն ինչ ըրին լարուածութեան մագլցումը նուազեցնելու համար, սակայն պատրաստ են բոլոր մարտահրաւէրներուն եւ կրնան դիմակայել զանոնք։ Ան նկատեց, որ պատերազմը տարածաշրջանին մէջ համապարփակ պատերազմի վերածուելու սեմին կը կանգնի, նշելով որ իրավիճակը Կազայի եւ Լիբանանի մէջ աղէտալի է եւ այս յարձակումներուն վերջ պէտք է տրուի։ Ան ընդգծեց, որ Իրանի նոր կառավարութիւնը բարիդրացիութեան քաղաքականութեամբ պիտի գործէ։
Արաքճի աւելցուց, որ իրենք ուշադիր կը հետեւին տարածաշրջանին մէջ ամերիկեան բոլոր շարժումներուն, միաժամանակ նշեց, որ իրենց բոլոր գործընկերները վստահեցուցած են, որ պիտի չօգտագործեն իրենց հողերն ու օդային տարածքը Իրանի վրայ յարձակելու համար:
Ան յայտնեց, որ իրենց դէմ կիրարկուող պատժամիջոցները արգելք չեն հանդիսանար Պարսից ծոցի երկիրներու հետ տնտեսական յարաբերութիւնները ամրապնդելու հարցով: Արաքճի ընդգծեց, որ իրենք պիտի պատասխանեն Իսրայէլի որեւէ յարձակման, մինչ տարածաշրջանի բոլոր երկիրները յայտնած են իրենց մերժումը Իրանի եւ անոր հիւլէական կառոյցներու վրայ յարձակման մասին: Ան կը կարծէ, որ հիւլէական կառոյցներու վրայ ռազմական յարձակումը եւ անոր սպառնալիքը մեծ ոճիր է, որ պէտք է հետապնդուի միջազգային հարթակներու վրայ։
