Միացեալ Նահանգներու արտաքին գործերու նախարար Անթոնի Պլինքըն երէկ ժամանեց Իսրայէլ՝ Միջին Արեւելք կատարած իր շրջագայութեան ծիրին մէջ, ուր պիտի հանդիպի վարչապետ Պենիամին Նեթանիահուի եւ Իսրայէլի նախագահ Իսհաք Հերցոքի հետ, որմէ ետք ան պիտի մեկնի Միջին Արեւելքի այլ երկիրներ, որոնց կարգին՝ Եգիպտոս եւ Քաթար:
Պլինքընի այցելութիւնը նպատակ ունի վերսկսիլ բանակցութիւնները գերիներու փոխանակման համաձայնագրի շուրջ եւ վերջ դնել Կազայի դէմ պատերազմին: Ան պիտի չփորձէ համոզել Նեթանիահուն ձեռնպահ մնալու Իրանի դէմ լայնածաւալ յարձակումէն, այլ պիտի առաջարկէ, որ նման յարձակումը զուսպ ըլլայ եւ Իսրայէլ չյարձակի Իրանի ռազմավարական թիրախներու վրայ, ինչպէս հիւլէական եւ նաւթային կառոյցները, որպէսզի Իսրայէլի եւ Իրանի միջեւ ուղղակի առճակատումը չընդարձակուի ՝ ի լրումն Կազայի եւ Լիբանանի դէմ Իսրայէլի պատերազմին: Սակայն Նեթանիահուն վերջերս կրկնեց, որ յարձակումը մեծ պիտի ըլլայ: Միացեալ Նահանգներու վարչակազմին գնահատումով Իսրայէլի եւ Համասի միջեւ Պլինքընի կողմէ գերիներու փոխանակման բանակցութիւնները յաջողութեան հասնելու կարելիութիւնները համեմատաբար փոքր են:
