Մինչ Միացեալ Նահանգներ կոչ կ’ուղղէ Պէյրութը չհրթիռակոծելու եւ Միջին Արեւելք ուղարկեց իր պատուիրակ Անթոնի Պլինքըն հրադադար հաստատելու համար, միւս կողմէ Իսրայէլ նախանցեալ գիշեր եւ երէկ անդադրում կերպով հրթիռակոծեց հարաւային Պէյրութի արուարձանները, յատկապէս Պըրժ Պարաժնէն, Ղպէյրին, Ուզահին, Լէյլէքին, Հատաս-Սենթ Թերեզ շրջանը, Ժընահը, «Սահել» հիւանդանոցը, Պէյրութի կառավարութեան հիւանդանոցի շրջակայքը: Ըստ Առողջապահութեան նախարարութեան տուեալերուն արձանագրուեցաւ 13 զոհ (մին երեխայ) եւ 57 վիրաւոր: Իսրայէլ պնդեց, որ յարձակման թիրախը Հըզպալլային հետ կապուած կառոյցներն են: Իսրայէլի իշխանութիւնները զգուշացուցած էին լիբանանցիները հեռանալու Պէյրութի հարաւային կարգ մը արուարձաններէն, սակայն Պէյրութի կառավարական հիւանդանոցը նշուած վայրերուն մէջ չկար:
Երէկ ամբողջ օրը իսրայէլեան օդուժը յարձակումներ գործեց Սուր, Նապաթիէ, Սայտա, Հերմել քաղաքներուն եւ Պէյրութի հարաւային արուարձաններուն վրայ:
Հըզպալլա երէկ հրթիռակոծեց Թել Աւիւի ծայրամասը գտնուող Նիրիթ շրջանը, նաեւ Թել Աւիւի արեւելքը գտնուող կանաչ գիծին յարող բնակավայրերը: Դիմադրութիւնը հրթիռներու խմբաքանակով թիրախաւորեց իսրայէլացի զինուորներու համախմբում մը հարաւային Մարքապա գիւղաքաղաքին մօտ: Իսրայէլեան ձայնասփիւռի կայանը հաղորդեց, որ Լիբանանի կողմէ հրթիռային հարուածներու հետեւանքով մեծ վնաս հասած է 20 տուներու եւ կառոյցներու, որոնք կը գտնուին Հայֆայէն հարաւ Քիպուց Մաաֆան Միքայէլ շրջանը:
