Վարչապետի պաշտօնակատար Նեժիպ Միքաթի իրանցի պատասխանատուներէն պահանջեց թեթեւցնել Լիբանանին հանդէպ դրսեւորուած կիրքը: Միքաթի բուռն քննադատեց Իրանի Շուրայի խորհուրդի նախագահ Մոհամմատ Պաքէր Քալիպաֆի վերջին յայտարարութիւնները, որոնց մէջ իրանցի պաշտօնատարը պատրաստակամութիւն յայտնած էր բանակցելու Ֆրանսայի հետ՝ ՄԱԿ-ի 1701 բանաձեւը գործադրելու առնչութեամբ: «Անձամբ հետեւեցայ Քալիպաֆի յայտարարութեան եւ արտայայտեցի մեր բողոքը: Կ’ըմբռնեմ, որ Իրան կ’ուզէ օժանդակել բանակցութիւններուն, սակայն ոչ մէկ կողմ իրաւունք ունի բանակցելու Լիբանանի պետութեան փոխարէն կամ խօսելու անոր անունով», յստակացուց Միքաթի:
