Լիբանանեան բանակը հրամանատարութիւնը յայտարարեց, թէ զինուորներ Թարէք Աքըլ Սոպհի, Ահմատ Հայտար եւ Ժաաֆար Ժաաֆար նախանցեալ օր զոհուած են հարաւային Այն Ըպլ գիւղին մէջ զինուորական մեքենայի մը թիրախաւորումին պատճառով:
Իսկ Առողջապահութեան նախարարութիւնը յայտարարեց, թէ անցնող 24 ժամերուն իսրայէլեան հարուածներէն զոհուած է շտապ օգնութեան խմբակներու չորս ծառայող, իսկ հինգ ուրիշներ վիրաւորուած են եւ նիւթական ծանր վնասներ կրած են անոնց ինքնաշարժները: Իսկ դեղագործներու սենտիքայի նախագահ Ճօ Սալլում յայտնեց, որ երրորդ դեղագործ մը զոհուած է լիբանանցիները իսրայէլեան ոտնձգութիւններէն պաշտպանելու նպատակով:
Իսրայէլեան օդուժը երէկ շարք մը յարձակումներ գործեց Լիբանանի հարաւային եւ արեւելեան շրջաններուն վրայ: Պեքաայի մէջ, անօդաչու սարքով թիրախաւորուեցաւ Հարէթ Ֆաքհանի գիւղը, իսկ Պաալպաքի Հայ Ինհամ թաղամասին մէջ մահացաւ վեց հոգի եւ վիրաւորուեցան ութ անձեր՝ բնակարանի մը կործանումին հետեւանքով:
Հարաւային Խարայէպ գիւղի ռմբակոծումը պատճառեց չորս զոհ եւ եօթը վիրաւոր: Իսրայէլեան օդուժը երէկ օրը սկսած էր շատ կանուխ՝ արեւածագին ռմբակոծելով Հըզպալլայի դրամատունը համարուող «Էլ-Քարտ էլ-Հասան» հաստատութեան մասնաճիւղերը, լիբանանեան բազմաթիւ շրջաններու մէջ:
Հըզպալլա յայտարարեց, թէ հակաօդային հրթիռ արձակած է իսրայէլեան ռազմական օդանաւի մը վրայ եւ զայն հեռացուցած է լիբանանեան օդային տարածքէն: Հըզպալլա նախապէս յայտարարած էր «Հերմեզ 900» տիպի անօդաչու արդիական սարք մը վար առնելու մասին:
Իսրայէլեան բանակին ձայնասփոիւռի կայանը հաղորդեց, թէ Լիբանանի հարաւային շրջաններուն մէջ ընթացող գործողութիւնները պիտի ամբողջանան քանի մը շաբաթ ետք ու սահմանային բնակավայրերէն տեղահանուած իսրայէլացիները պիտի կարենան վերադառնալ տուն:
Իսրայէլեան բանակը երէկ յայտարարեց, թէ Հըզպալլա հինգ հրթիռ արձակած է Թել Աւիւի «Պեն Կորիոն» օդակայանին ուղութեամբ, հետեւաբար որոշում կայացուած է ժամանակաւորապէս առկախել նշեալ ենթակառոյցին գործունէութիւնը, մինչեւ հաւանական վտանգներու փարատումը: Իսկ Հայֆայի նաւահանգիստին մէջ աշխատող պաշտօնեաներ ստացան նաւահանգիստը թիրախաւորելու մասին ահազանգող նամակներ:
