Արաբական Ծոցի Աստուածաշունչի Ընկերութեան Խնամակալ մարմինը ուրախութեամբ կը տեղեկացնէ, թէ իր ընդհանուր քարտուղար՝ դոկտ. Հրայր Ճէպէճեան Հինգշաբթի, 17 Հոկտեմբեր 2024-ին, պարգեւատրուած է Լապիպ Մատանադի յիշատակին յատկացուած պարգեւատրում-արժանիքին։
Ամերիկայի Միացեալ Նահանգներու մէջ հաստատուած միջազգային Strategic Resource Group (SRG) քրիտոնէական կազմակերպութեան կողմէ հիմնուած այս մրցանակը կը միտի պարգեւատրելու անհատներ, որոնք իրենց կեանքով եւ գործունէութեամբ կը սատարեն իրենց շրջանակներու հոգեւոր, ընկերային եւ մշակութային բարգաւաճումին։ Մրցանակաբաշխումը տեղի ունեցաւ Հոլանտայի Ամսթերտամ քաղաքին մէջ։ Դոկտ. Հրայր Ճէպէճեան ստացաւ այս մրցանակը՝ Աստուածաշունչի առաքելութեան եւ իր երկար տարիներու բազմաբեղուն գործունէութեան համար Միջին Արեւելքի եւ Արաբական Ծոցի երկիրներու մէջ։
Լապիպ Մատանադ՝ յորդանանցի-պաղեստինցի Աստուածաշունչի գործիչ, մեծապէս սատարած է հոգեւոր, ընկերային եւ բարեսիրական գործունէութիւններու ծաւալման, եւ համերաշխութիւն եւ երկխօսութիւն սատարելուն համար։ Ան մահացաւ 2021-ին եւ այս մրցանակը հիմնուեցաւ յարգելու եւ վառ պահելու իր գործունէութիւնը եւ յիշատակը։ Պարգեւը աման մըն է՝ ճափոնական մշակութային «Kintsugi» արուեստի նմուշ մը։ Այդ կը խորհրդանշէ փշրուած ամանի մը կտորները, որոնք ի մի կը բերուին ոսկեայ երանգներով, որ վերամիանալով կը ներկայացնեն փշրուած ու վիրաւոր կեանքեր վերանորոգելու իրականութիւնը։
Շնորհաւորութիւններ դոկտ. Հրայր Ճէպէճեանին այս պարգեւատրումին համար, եւ նորանոր յաջողութիւններ կը մաղթենք անոր։
Խնամակալ Մարմին
Արաբական Ծոցի Աստուածաշունչի Ընկերութիւն
