Խմբագրատանս շեմէն ներս ամէն մէկ այցելութիւն ոգեւորիչ ազդեցութեամբ կ’ուրախացնէ մեզ: Այդօրինակ խրախուսիչ այցերէն մին կատարուեցաւ Ս.Դ.Հ.Կ.-ի Լիբանանի շրջանի Վարիչ մարմինի ընկերներուն կողմէ, գլխաւորութեամբ ատենապետին՝ ընկեր Վանիկ Տագէսեանի: Անոնք բարոյական պարտք համարած էին հանդիպիլ հայ մամուլի այս երախտաշատ անկիւնը եւ քաջալերել «Արարատ»ի տնօրէնութիւնն ու պաշտօնէութիւնը, ինչպէս նաեւ խորհրդակցիլ յառաջիկային կատարուելիք ծրագրերուն շուրջ: Վարիչ մարմինի ընկերները չմոռցան նաեւ իրենց շնորհաւորութիւնը փոխանցել «Մամուլի Օր»ուան առիթով: Անոնք պատրաստակամութիւն յայտնեցին շարունակելու իրենց նեցուկը «Արարատ»ին, այս ապահովական մտահոգիչ օրերուն անոր դիմագրաւած դժուարութիւններուն համար:
Տնօրէնութիւնս փոխադարձաբար շնորհակալութիւն յայտնեց Վարիչ մարմնոյ ընկերներուն՝ անոնց կատարած գնահատելի «ժեսթ»ին համար:
