Թուրքիոյ նախագահ Ռեճեb Թայիb Էրտողան Սթամպուլի մէջ Գերմանիոյ վարչապետ Օլաֆ Շուլցի հետ հանդիպումէն ետք կայացած մամլոյ ասուլիսի ընթացքին նշեց, որ ան Շուլցի հետ քննարկած է Կազայի եւ պաղեստինեան մնացեալ տարածքներուն մէջ Իսրայէլի իրականացուցած ցեղասպանութիւնը եւ Լիբանանի դէմ անոր յարձակումները։ Ան մատնանշեց, որ Իսրայէլի եւ անոր վարչապետ Պենիամին Նեթանիահուի մտածելակերպին մէջ կայ յստակ մօտեցում՝ ընդլայնել այս պատերազմը, եւ ոչ թէ պահել սեղմ շրջանակի մէջ։
Իսկ երկկողմանի յարաբերութիւններուն վերաբերեալ ան նշեց, որ իրենք տարբեր ոլորտներու մէջ սերտ յարաբերութիւններ ունին Հիւսիսատլանտեան դաշինքի (ՆԱԹՕ) իրենց դաշնակից Գերմանիոյ հետ: Ան փափաք յայտնեց Թուրքիոյ համագործակցութիւնը ամրապնդել Գերմանիոյ հետ՝ յաղթահարելով առկախ որոշ խնդիրներ։ Ան յայտնեց, որ ինք եւ Շուլցը ձեռք բերած են ընդհանուր կամք՝ պայքարելու ահաբեկչական կազմակերպութիւններու դէմ, յատկապէս «Փի.Քի.Քի.»-ի եւ «Կիւլեն»-ի, որոնք նոյնպէս լուրջ վտանգ կը ներկայացնեն Գերմանիոյ համար:
