Իսրայէլեան լրատուամիջոցները Շաբաթ օր հաղորդեցին, որ Լիբանանէն անօդաչու թռչող սարք ինկած է Քասրերիոյ մէջ՝ Հայֆայէն հարաւ՝ նշելով, որ վնաս հասած է Նեթանիոյ հիւսիսը գտնուող Քայսերիոյ մէջ շէնքի մը։ Թիրախաւորուած շէնքը Իսրայէլի վարչապետ Պենիամին Նեթանիահուի անձնական նստավայրն է։
Իսրայէլի վարչապետ Պենիամին Նեթանիահուի գրասենեակը յայտարարեց, որ անօդաչու թռչող սարք արձակուած է Լիբանանէն եւ ուղղակիօրէն հարուածած է Պենիամին Նեթանիահուի տունը՝ Կեսարիոյ մէջ, Հայֆայէն հարաւ, բայց ան այնտեղ չէր գտնուեր։ «Ուալլա» կայքը հաստատեց, որ անօդաչու սարքը, որ հարուածեց Իսրայէլի վարչապետ Պենիամին Նեթանիահուի տունը, պայթած է, չնայած իսրայէլեան ռազմական ուղղաթիռները կը հետապնդէին զայն ամբողջ ժամանակ: Ռազմական աղբիւրը յայտնեց, որ Անվտանգութեան ծառայութիւնները անօդաչու սարքի Կեսարիա ժամանումը կը տեսնեն իբրեւ անվտանգութեան շատ լուրջ ձախողութիւն:
Իսրայէլեան կառավարութենէն բարձրաստիճան պաշտօնատար մը իսրայէլեան պատկերասփիւռի 12-րդ կայանին յայտնեց, որ Իրան մահափորձի ենթարկած է Իսրայէլի վարչապետ Պենիամին Նեթանիահուն: Իսկ վերջինս յայտնեց, որ «Իրանի գործակատարները», որոնք փորձեցին զինք ու իր կինը սպաննել, մեծ սխալ գործեցին:
Ան նշեց, որ իր դէմ մահափորձը պիտի չտկարացնէ զինք, այլ պիտի շարունակուի Իսրայէլի կողմէ թշնամիներուն դէմ պատերազմը յանուն վերածնունդի: Ան, խօսքը ուղղելով իրանցիներուն, ըսաւ, որ Իսրայէլի քաղաքացիներուն վնաս տուողը ծանր գին պիտի վճարէ։ Ան հաստատեց, որ Իսրայէլը պիտի հասնի իր առաջադրած պատերազմական բոլոր նպատակներուն եւ պիտի փոխէ տարածաշրջանի անվտանգութեան իրականութիւնը:
Իսրայէլի պատկերասփիւռի կայանը հաղորդեց, որ վարչապետին շրջապատը Նեթանիահուի մահափորձէն ետք կ’առաջադրեն Իրանի դէմ պատասխանը ըլլայ աւելի կարծր: Բրիտանիոյ վարչապետ Քիր Սթարմըր հեռաձայնային հաղորդակցութիւն մը ունեցաւ Իսրայէլի վարչապետին հետ եւ մտահոգութիւն յայտնեց այս դէպքին կապակցութեամբ: Իրանի արտաքին գործոց նախարարութիւնը հերքեց Նեթանիահուի ամբաստանութիւնը, թէ Իրան կը կանգնի իր տան վրայ յարձակումին ետին:
